சர்வதேச மகளிர் தினத்தை முன்னிட்டு நடைபெற்ற தமிழக வெற்றிக் கழகத்தின் விழாவில், பெண்களுக்கான பல்வேறு இலவசத் திட்டங்களை நடிகர் விஜய் அறிவித்திருந்தார். மகளிருக்கு மாதம் ரூ. 2,500 உதவித்தொகை, இலவசப் பேருந்து பயணம், ஆண்டுக்கு 6 கேஸ் சிலிண்டர்கள் மற்றும் திருமணத்திற்குத் தங்கம் என அவர் வெளியிட்ட வாக்குறுதிகள் அரசியல் களத்தில் பெரும் விவாதத்தை ஏற்படுத்தியுள்ளன. விஜய்யின் இந்தத் திட்டங்கள் ஏற்கனவே திமுக அரசு செயல்படுத்தி வரும் நலத்திட்டங்களை நகலெடுப்பதாக அமைந்துள்ளதாகப் பலரும் விமர்சித்து வருகின்றனர்.
இதற்குப் பதிலளித்த விடுதலை சிறுத்தைகள் கட்சித் தலைவர் திருமாவளவன், விஜய்யின் அறிவிப்பை ‘புலியைப் பார்த்து பூனை கோடு போட்டுக் கொண்ட கதை’ என்று விமர்சித்துள்ளார். திமுக கூட்டணியின் வலிமையை எதிர்கொள்ள முடியாமல், மக்கள் செல்வாக்கை ஈர்க்க இத்தகைய வாக்குறுதிகளை அளிக்க வேண்டிய கட்டாயத்தில் விஜய் இருப்பதாக அவர் குறிப்பிட்டுள்ளார். இருப்பினும், இத்தகைய அறிவிப்புகள் திமுக கூட்டணியின் வாக்கு வங்கியை எந்த வகையிலும் பாதிக்காது என்று திருமாவளவன் நம்பிக்கை தெரிவித்துள்ளார்.