2026 சட்டமன்றத் தேர்தலை முன்னிட்டு, தமிழக அரசியல் களம் இப்போதே சூடுபிடிக்கத் தொடங்கியுள்ளது. குறிப்பாக, ஆளும் திமுகவில் வேட்பாளர் தேர்வு குறித்து வெளியாகியுள்ள செய்திகள் அக்கட்சியின் தலைமை அலுவலகமான அறிவாலயத்தில் பெரும் அதிர்வலைகளை ஏற்படுத்தியுள்ளன. வாரிசு அரசியல் விமர்சனங்களைத் தவிர்க்கவும், தொகுதிகளில் நிலவும் மக்கள் அதிருப்தியைச் சரிசெய்யவும், முதலமைச்சர் மு.க. ஸ்டாலின் இந்த முறை ஒரு “சர்ஜிகல் ஸ்ட்ரைக்” பாணியிலான மாற்றத்தைக் கையிலெடுத்துள்ளதாகத் தகவல்கள் கசிகின்றன.
இந்தத் தேர்தலில் திமுக 180-க்கும் மேற்பட்ட தொகுதிகளில் போட்டியிடத் திட்டமிட்டுள்ள சூழலில், கட்சியின் எதிர்காலத்தைக் கருத்தில் கொண்டு பல மூத்த தலைவர்களுக்கு இந்த முறை வாய்ப்பு மறுக்கப்படலாம் என்று கூறப்படுகிறது. குறிப்பாக, வயது முதிர்வு மற்றும் தொகுதிகளில் உள்ள மக்கள் அதிருப்தி போன்ற காரணங்களை அடிப்படையாகக் கொண்டு, துரைமுருகன், பொன்முடி, ஐ. பெரியசாமி, கே.கே.எஸ்.எஸ்.ஆர். ராமச்சந்திரன், ரகுபதி, காந்தி, நாசர் உள்ளிட்ட சுமார் 11 முக்கிய அமைச்சர்கள் மற்றும் சில எம்.எல்.ஏ-க்களின் பெயர்கள், மீண்டும் போட்டியிட வாய்ப்பில்லாதவர்களின் பட்டியலில் இருப்பதாகப் பேசப்படுகிறது.
திமுக மட்டுமின்றி, கூட்டணியில் உள்ள காங்கிரஸ் கட்சியும் அதிரடி மாற்றங்களுக்குத் தயாராகி வருகிறது. காங்கிரஸ் கட்சிக்கு ஒதுக்கப்பட்ட 28 தொகுதிகளில் வெற்றி வாய்ப்புள்ள வேட்பாளர்களைத் தேர்வு செய்ய, ராகுல் காந்தி பிரத்யேகக் குழுவைச் சென்னைக்கு அனுப்பியுள்ளதாகத் தெரிகிறது. கட்சிக்காகக் நீண்ட காலம் உழைத்தவர்களுக்கு முன்னுரிமை அளிக்கும் வகையிலும், புதிய முகங்களுக்கு வாய்ப்பளிக்கும் வகையிலும் அந்தப் பட்டியல் அமையும் என எதிர்பார்க்கப்படுகிறது.
ஒட்டுமொத்தமாக, திமுக மற்றும் காங்கிரஸ் ஆகிய இரு கட்சிகளுமே இளைஞர்களுக்கும் புதிய முகங்களுக்கும் அதிக முக்கியத்துவம் அளிக்க முன்வந்துள்ளதால், வரும் சட்டமன்றத் தேர்தல் களம் மிகுந்த எதிர்பார்ப்புக்குரியதாக மாறியுள்ளது. எனினும், தேர்தல் தேதி அறிவிக்கப்பட்டு, அதிகாரப்பூர்வ வேட்பாளர் பட்டியல் வெளியாகும் வரை இவை அனைத்தும் ஊகங்களே. ஸ்டாலினின் இந்த வியூகம் தேர்தலில் எந்த மாதிரியான தாக்கத்தை ஏற்படுத்தும் என்பதைப் பொறுத்திருந்துதான் பார்க்க வேண்டும்.