தமிழக அரசியல் களத்தில், வரவிருக்கும் சட்டமன்றத் தேர்தலுக்காக திமுக தலைமையிலான கூட்டணியில் காங்கிரஸ் கட்சி தொடர்ந்து நீடிக்க முடிவெடுத்துள்ளது. இதற்காக காங்கிரஸ் கட்சிக்கு 28 சட்டமன்றத் தொகுதிகளும், ஒரு மாநிலங்களவை (ராஜ்யசபா) இடமும் ஒதுக்கீடு செய்யப்பட்டுள்ளன. நீண்ட இழுபறிக்கு பிறகு இந்த உடன்பாடு எட்டப்பட்டிருந்தாலும், இந்த கூட்டணி நீடிப்பதற்கு முன்னாள் மத்திய அமைச்சர் ப.சிதம்பரம் மிக முக்கிய பங்காற்றியுள்ளார்.
இருப்பினும், இந்த தொகுதிப் பங்கீடு ராகுல் காந்திக்கு முழுமையான திருப்தியை அளிக்கவில்லை என்று கூறப்படுகிறது. குறிப்பாக, தாம் எதிர்பார்த்த அளவிலான தொகுதிகள் கிடைக்காததும், திமுக கூட்டணிக்கு அதிக அழுத்தம் கொடுத்து கூடுதல் தொகுதிகளைப் பெற காங்கிரஸ் மாநிலத் தலைவர்கள் தவறியதும் ராகுல் காந்திக்கு அதிருப்தியை ஏற்படுத்தியுள்ளதாகத் தெரிகிறது. தென் மாநிலங்களில் காங்கிரஸ் கட்சியின் பலத்தை அதிகரிக்க வேண்டும் என்பதில் ராகுல் காந்தி உறுதியாக உள்ள நிலையில், தமிழகத்தின் தற்போதைய நிலைப்பாடு அவருக்கு வருத்தத்தை அளித்துள்ளது.
கூட்டணி விவகாரத்தில் சோனியா காந்தியின் தலையீடு மற்றும் ப.சிதம்பரத்தின் நகர்வுகள் முக்கிய பங்கு வகித்தன. கருணாநிதியின் காலம் தொட்டே திமுகவுடன் நெருக்கமான உறவைப் பேணி வரும் சோனியா காந்தி, வரவிருக்கும் மக்களவைத் தேர்தலைக் கருத்தில் கொண்டு திமுக கூட்டணியில் நீடிப்பதே காங்கிரஸ் கட்சிக்கு ஆரோக்கியமானது என்று கருதியதாகச் சொல்லப்படுகிறது. இதன் அடிப்படையில் ப.சிதம்பரம் காய் நகர்த்தி, திமுக கூட்டணியை மீண்டும் உறுதி செய்தார்.
இந்த முடிவுகளில் ராகுல் காந்திக்கு உடன்பாடு இல்லாததோடு, ராஜ்யசபா சீட் ஒதுக்கீட்டிலும் சில கருத்து வேறுபாடுகள் எழுந்ததாகத் தெரிகிறது. ராகுலுக்கு நெருக்கமான ஒருவருக்கு அந்த சீட் வழங்கப்பட வேண்டும் என காங்கிரஸ் விரும்பிய நிலையில், தமிழகத்தைச் சேர்ந்த ஒருவருக்கே அந்த இடம் வழங்கப்பட வேண்டும் என்பதில் திமுக பிடிவாதமாக இருந்தது. இத்தகைய பல்வேறு காரணங்களால், தொகுதிப் பங்கீடு மற்றும் கூட்டணி முடிவுகளில் ப.சிதம்பரத்தின் செயல்பாடுகள் மீது ராகுல் காந்தி அதிருப்தியில் இருப்பதாக அரசியல் வட்டாரங்களில் பேசப்படுகிறது.