மத்திய கிழக்கு பிராந்தியத்தில் பதற்றம் அதிகரித்துள்ள நிலையில், ஈரான் அதிபர் மசூத் பெசெஷ்கியான் தனது முந்தைய நிலைப்பாட்டில் இருந்து அதிரடி மாற்றத்தை வெளிப்படுத்தியுள்ளார். அண்டை நாடுகள் மீது நடத்தப்பட்ட தாக்குதல்களுக்காக தான் மன்னிப்பு கோரியதாக வெளியான தகவல்கள் தவறாகப் புரிந்து கொள்ளப்பட்டதாக அவர் விளக்கம் அளித்துள்ளார். ஈரானின் பாதுகாப்புக்கு அச்சுறுத்தல் ஏற்பட்டால், அதற்குத் தகுந்த பதிலடி கொடுப்பதைத் தவிர வேறு வழியில்லை என்று அவர் திட்டவட்டமாகத் தெரிவித்துள்ளார்.
ஈரான் மீதான தாக்குதல்கள் தீவிரமடைந்து வரும் நிலையில், பஹ்ரைன், குவைத் மற்றும் ஐக்கிய அரபு அமீரகம் உள்ளிட்ட நாடுகளில் சக்திவாய்ந்த வெடிப்புச் சத்தங்கள் கேட்டன. குறிப்பாக, துபாயின் மெரினா பகுதியில் உள்ள குடியிருப்பு கட்டிடம் ஒன்றில் ஏவுகணை அல்லது ட்ரோன் சிதறல்கள் விழுந்ததால் தீ விபத்து ஏற்பட்டதாகத் தகவல்கள் தெரிவிக்கின்றன. அண்டை நாடுகளைத் தாக்க மாட்டோம் என்று ஈரான் முதலில் உறுதியளித்திருந்த நிலையில், இந்தத் தாக்குதல்கள் பெரும் அதிர்ச்சியை ஏற்படுத்தியுள்ளன.
முன்னதாக, தொலைக்காட்சியில் உரையாற்றிய அதிபர் பெசெஷ்கியான், அண்டை நாடுகளிடம் மன்னிப்பு கோருவதாகவும், பிராந்திய அமைதியையே விரும்புவதாகவும் குறிப்பிட்டிருந்தார். ஈரானைத் தாக்கத் தங்கள் நிலப்பரப்பைப் பயன்படுத்த அனுமதிக்காத நாடுகள் மீது இனி தாக்குதல் நடத்தப்படாது என்றும் அவர் தெரிவித்திருந்தார். ஆனால், இந்த அறிவிப்பு வெளியான சில மணி நேரங்களிலேயே ஈரானின் நீதித்துறைத் தலைவர் இதற்கு முரணான கருத்தை வெளியிட்டது குழப்பத்தை ஏற்படுத்தியது.
தற்போது தனது கருத்தை மாற்றிக்கொண்டுள்ள ஈரான் அதிபர், “எங்கள் நாடு மிரட்டல்களுக்கோ அல்லது அடக்குமுறைகளுக்கோ ஒருபோதும் தலைவணங்காது” என்று கூறியுள்ளார். தங்களுக்கு அழுத்தம் கொடுக்கப்படும்போது, பதிலடி மிகவும் கடுமையாக இருக்கும் என்றும் அவர் எச்சரித்துள்ளார். ஈரானின் இந்த திடீர் நிலைப்பாட்டு மாற்றம் மற்றும் அண்டை நாடுகளில் தொடரும் வெடிப்புகள் காரணமாக மத்திய கிழக்கு பகுதியில் அமைதி திரும்பும் என்ற எதிர்பார்ப்பு கேள்விக்குறியாகியுள்ளது.