புதுச்சேரியில் நடைபெற்ற நாம் தமிழர் கட்சியின் வேட்பாளர் அறிமுகக் கூட்டத்தில் பங்கேற்றுப் பேசிய அக்கட்சியின் தலைமை ஒருங்கிணைப்பாளர் சீமான், தமிழக மற்றும் புதுச்சேரி அரசுகளின் கடன் சுமை மற்றும் இலவசத் திட்டங்கள் குறித்துக் கடுமையான விமர்சனங்களை முன்வைத்துள்ளார். மக்களுக்குச் சேவை செய்வதற்கு எதற்காகப் பணம் கொடுக்க வேண்டும் என்று கேள்வி எழுப்பிய அவர், தேர்தல் காலங்களில் மக்களுக்கு வழங்கப்படும் சிறிய அளவிலான தொகையானது, உண்மையில் அவர்களின் தலைமீது பெரும் கடன் சுமையை ஏற்றி வைக்கும் செயலாகும் என்று சாடினார்.
இது குறிப்பாக, பொங்கல் பரிசு மற்றும் மகளிர் உரிமைத் தொகை போன்ற திட்டங்களைச் சுட்டிக்காட்டிய அவர், இதுபோன்ற இலவசங்கள் மக்களின் வாழ்வாதாரத்தை உயர்த்தாமல், அவர்களைக் கடன் வளையத்திற்குள்ளேயே வைத்திருக்கும் என்று வேதனையோடு குறிப்பிட்டார். மேலும், நூறு நாள் வேலைத் திட்டம் போன்ற திட்டங்களால் விவசாயம் பெருமளவில் பாதிக்கப்பட்டுள்ளதாகக் குற்றம் சாட்டிய சீமான், இலவச அரிசி வழங்கும் முறையையும் விமர்சித்தார்.
இந்நிலையில் ஒரு காலத்தில் குறைந்த விலைக்கு அரிசி வழங்கப்பட்ட நிலையில், இன்று மக்கள் ஒரு ரூபாய் கூட கொடுத்து அரிசி வாங்க முடியாத நிலைக்குத் தள்ளப்பட்டுவிட்டதாக அவர் தெரிவித்தார். “நாடே கையேந்தினால் அது இலவசம் என்றும், தனிநபர் கையேந்தினால் அது பிச்சை என்றும் அழைக்கப்படுகிறது” என்று குறிப்பிட்ட அவர், இத்தகைய திராவிட மற்றும் தேசியக் கட்சிகளின் ஆட்சி முறையை ஒழித்து, புதிய அரசியல் மாற்றத்தை ஏற்படுத்த வேண்டியது அவசியம் என்றும் வலியுறுத்தினார்.