தமிழக முதல்வர் மு.க. ஸ்டாலின், திமுக – காங்கிரஸ் இடையேயான கூட்டணி உடன்படிக்கை சுமுகமாக முடிவடைந்ததை அடுத்து, தான் செய்த “All Finished” என்ற சைகை திட்டமிட்டு செய்யப்பட்டதல்ல என்று விளக்கம் அளித்துள்ளார். தஞ்சாவூரில் நடைபெற்ற அமைச்சர் அன்பில் மகேஷ் பொய்யாமொழியின் இல்லத் திருமண விழாவில் கலந்து கொண்டு பேசிய போது அவர் இதனைத் தெரிவித்தார். நீண்ட இழுபறிக்குப் பிறகு கூட்டணி ஒப்பந்தம் கையெழுத்தான மகிழ்ச்சியில் இந்த சைகை இயல்பாக வெளிப்பட்டதாக அவர் குறிப்பிட்டுள்ளார்.
கடந்த சில நாட்களாக திமுக மற்றும் காங்கிரஸ் கட்சிகளிடையே தொகுதிப் பங்கீடு தொடர்பாகப் பல்வேறு கட்டப் பேச்சுவார்த்தைகள் நடைபெற்று வந்தன. காங்கிரஸ் தரப்பில் கூடுதல் தொகுதிகள் மற்றும் மாநிலங்களவை இடங்கள் கோரப்பட்டதால் கூட்டணி நீடிக்குமா என்ற சந்தேகம் அரசியல் வட்டாரத்தில் எழுந்தது. இந்நிலையில், மார்ச் 5ஆம் தேதி மாநிலங்களவை தேர்தலுக்கான வேட்புமனுத் தாக்கலுக்குக் கடைசி நாள் என்பதால், அதற்கு முன்னதாகவே உடன்பாட்டை எட்ட வேண்டிய கட்டாயம் இரு தரப்பிற்கும் ஏற்பட்டது.
நேற்று முன்தினம் இரவு, காங்கிரஸ் மூத்த தலைவர் ப.சிதம்பரம் மற்றும் முதல்வர் ஸ்டாலின் இடையே நடைபெற்ற ஆலோசனையில் இறுதி முடிவு எட்டப்பட்டது. இதன்படி, காங்கிரஸிற்கு 28 தொகுதிகள் மற்றும் ஒரு மாநிலங்களவை இடம் ஒதுக்க திமுக சம்மதித்தது. இந்த ஒப்பந்தம் கையெழுத்தான பிறகு, தனது இல்லத்திலிருந்து வெளியேறிய முதல்வர் ஸ்டாலின், அங்கிருந்த செய்தியாளர்களைப் பார்த்து மகிழ்ச்சியுடன் கையை உயர்த்தி “எல்லாம் முடிந்துவிட்டது” (All Finished) என்று சைகை காட்டினார். இந்த வீடியோ சமூக வலைதளங்களில் மிக வேகமாகப் பரவி வைரலானது.
தஞ்சை விழாவில் இது குறித்துப் பேசிய முதல்வர், “நேற்று இரவு வரை கூட்டணிப் பேச்சுவார்த்தையை வெற்றிகரமாக முடித்துவிட்டுத்தான் இந்த விழாவிற்கு வந்துள்ளேன். காரில் ஏறும் போது பத்திரிகையாளர்கள் கேள்வி எழுப்பியதால், எல்லாம் சுமுகமாக முடிந்துவிட்டது என்பதை உணர்த்தவே அந்த சைகையைக் காட்டினேன். அது இன்று இவ்வளவு பெரிய விவாதமாக மாறும் என்று நான் நினைக்கவில்லை” என்றார். மேலும், கூட்டணி வேட்பாளர்கள் இன்று வேட்புமனுத் தாக்கல் செய்ய உள்ளதால், திருமணத்தை முடித்துவிட்டு உடனடியாக சென்னை திரும்ப உள்ளதாகவும் அவர் தெரிவித்தார்.