தமிழக வெற்றிக் கழகத்தின் (தவெக) தலைவர் விஜய், இன்று தஞ்சாவூர் மாவட்டம் செங்கிப்பட்டி அருகே உள்ள அய்யாசாமிப்பட்டியில் கட்சியின் முக்கிய நிர்வாகிகளை நேரில் சந்தித்துப் பேசுகிறார். முன்னதாக கரூரில் ஏற்பட்ட சில அசம்பாவிதங்களைத் தவிர்க்கும் வகையில், தனது பொதுக்கூட்டங்களை ‘நிர்வாகிகள் சந்திப்பாக’ விஜய் மாற்றியுள்ளார். இதன்படி, சுமார் 9 ஏக்கர் பரப்பளவில் பிரம்மாண்டமாக அமைக்கப்பட்டுள்ள இந்தத் திடலில், தஞ்சை மாவட்டத்தைச் சேர்ந்த 8 சட்டமன்றத் தொகுதிகளின் முக்கிய நிர்வாகிகள் மட்டுமே பங்கேற்கும் வகையில் ஏற்பாடுகள் செய்யப்பட்டுள்ளன.
பாதுகாப்பு மற்றும் கூட்ட நெரிசலைக் கருத்தில் கொண்டு, இந்தச் சந்திப்பிற்குத் தீவிரமான கட்டுப்பாடுகள் விதிக்கப்பட்டுள்ளன. மொத்தம் 4,900 நிர்வாகிகளுக்கு மட்டுமே ‘கியூ ஆர் கோடு’ (QR Code) அடங்கிய சிறப்பு நுழைவுச் சீட்டுகள் வழங்கப்பட்டுள்ளன. இந்த அட்டையை ஸ்கேன் செய்த பின்னரே நிர்வாகிகள் உள்ளே அனுமதிக்கப்படுகின்றனர். கர்ப்பிணிப் பெண்கள், முதியவர்கள் மற்றும் குழந்தைகளுக்குப் பாதுகாப்பு காரணங்களுக்காக அனுமதி மறுக்கப்பட்டுள்ளதோடு, முறையான பாஸ் இல்லாத தொண்டர்களும் பொதுமக்களும் கூட்டத்திற்கு வர வேண்டாம் எனத் தவெக தலைமை முன்கூட்டியே அறிவுறுத்தியிருந்தது.
இதற்கிடையில், இன்று காலை சென்னையில் இருந்து விமானம் மூலம் திருச்சி வந்த விஜய், அங்கிருந்து கார் மூலம் செங்கிப்பட்டிக்கு விரைந்தார். அவர் வரும் வழியெங்கும் ரசிகர்கள் உற்சாக வரவேற்பு அளித்தனர். அதேநேரம், கூட்டம் நடைபெறும் செங்கிப்பட்டி திடலில் முறையான பாஸ் இல்லாமல் குவிந்த தொண்டர்களைப் போலீசார் மற்றும் தவெக தன்னார்வலர்கள் தடுத்து நிறுத்தினர். இதனால் அப்பகுதியில் சிறிது நேரம் சலசலப்பு ஏற்பட்டது.
இந்தக் கெடுபிடிகளுக்கு மத்தியிலும், ‘போலி கியூ ஆர் கோடு’ அட்டையுடன் கூட்டத்திற்குள் நுழைய முயன்ற நபர் ஒருவரைப் போலீசார் கச்சிதமாகப் பிடித்துள்ளனர். அந்த அட்டையில் மாவட்டச் செயலாளரின் அதிகாரப்பூர்வ சீல் இல்லாததை வைத்துக் கண்டுபிடித்த போலீசார், அந்த நபரை எச்சரித்துத் திருப்பி அனுப்பினர். தேர்தல் நெருங்கும் வேளையில், தனது கட்சியின் கட்டமைப்பை உறுதிப்படுத்தவும், அடுத்தகட்டப் பிரச்சார யுக்திகளை வகுக்கவும் விஜய் தஞ்சையில் மேற்கொள்ளும் இந்தச் சந்திப்பு அரசியல் வட்டாரத்தில் உற்று நோக்கப்படுகிறது.