அமெரிக்க அதிபர் டொனால்ட் டிரம்ப், ஈரானின் ராணுவக் கட்டமைப்பு மற்றும் தலைமை முற்றிலும் சிதைந்துவிட்டதாகத் தெரிவித்துள்ளார். ஈரானின் வான் பாதுகாப்புப் படை (Air Defence), விமானப்படை (Air Force) மற்றும் கடற்படை (Navy) ஆகியவை அமெரிக்க மற்றும் இஸ்ரேலியத் தாக்குதல்களால் அழிக்கப்பட்டுவிட்டதாகவும், அந்நாட்டுத் தலைமை இப்போது பேச்சுவார்த்தைக்கு முன்வந்துள்ளதாகவும் அவர் கூறியுள்ளார். இருப்பினும், இந்தச் சூழலில் பேச்சுவார்த்தை நடத்துவதற்கு “காலம் கடந்துவிட்டது” (Too Late) என அவர் திட்டவட்டமாக மறுத்துவிட்டார்.
கடந்த சில நாட்களாக ஈரான் மீது அமெரிக்கா மற்றும் இஸ்ரேல் இணைந்து நடத்தி வரும் தீவிர வான்வழித் தாக்குதல்களில் நூற்றுக்கணக்கானோர் உயிரிழந்துள்ளனர். ஈரானின் அணுசக்தித் திட்டங்களைத் தடுப்பதையும், பிராந்தியத்தில் அதன் செல்வாக்கைக் குறைப்பதையுமே இந்தத் தாக்குதலின் முக்கிய நோக்கமாக டிரம்ப் முன்னிறுத்துகிறார். ஈரானிடம் மிகவும் ஆபத்தான ஆயுதங்கள் இருப்பதாகவும், அவர்கள் முதலில் தாக்குதல் நடத்தத் திட்டமிட்டிருந்ததாகவும், அதை முறியடிக்கவே இந்த நடவடிக்கை எடுக்கப்பட்டதாகவும் அவர் விளக்கம் அளித்துள்ளார்.
ஈரானுடனான இந்தப் போர் இன்னும் நான்கு முதல் ஐந்து வாரங்கள் வரை நீடிக்க வாய்ப்புள்ளதாக டிரம்ப் கணித்துள்ளார். ஈரானின் உச்ச தலைவர் அயதுல்லா அலி காமேனி கொல்லப்பட்டதைத் தொடர்ந்து, அந்நாட்டின் புதிய தலைமை குறித்த விவாதங்களும் எழுந்துள்ளன. அமெரிக்கா எப்போதும் அமைதியை விரும்புவதாகவும், ஆனால் ஈரானின் பிடிவாதமான போக்கால் தற்போது பேச்சுவார்த்தைக்கான வாய்ப்புகள் முடிவுக்கு வந்துவிட்டதாகவும் டிரம்ப் தனது சமூக வலைதளப் பதிவில் குறிப்பிட்டுள்ளார்