முன்னாள் முதலமைச்சர் ஓ.பன்னீர்செல்வம் திமுகவில் இணைந்த முடிவானது அவரது ஆதரவாளர்கள் மத்தியில் பெரும் அதிர்வலைகளையும் அதிருப்தியையும் ஏற்படுத்தியுள்ள நிலையில், தேனி மாவட்ட அரசியல் களம் தற்போது சூடுபிடிக்கத் தொடங்கியுள்ளது. ஓபிஎஸ்-ஸின் நம்பிக்கைக்குரிய “வலது கரம்” என்று அழைக்கப்பட்ட மார்க்கையன்கோட்டை முன்னாள் பேரூராட்சித் தலைவர் அகிலன் மற்றும் பெரியகுளம் நகர நிர்வாகிகள் உள்ளிட்ட முக்கிய நிர்வாகிகள் பலர், அவரது தலைமையிலிருந்து விலகி எடப்பாடி பழனிசாமி முன்னிலையில் மீண்டும் அதிமுகவில் தங்களை இணைத்துக் கொண்டனர்.
இந்த அதிரடி அரசியல் மாற்றத்தின் வெளிப்பாடாக, அவர்கள் தங்கள் வீடுகளில் நீண்டகாலமாக வைத்திருந்த ஓபிஎஸ்-ஸின் புகைப்படங்களை அதிரடியாக அகற்றிவிட்டு, அதற்குப் பதிலாக அதிமுக பொதுச்செயலாளர் இபிஎஸ்-ஸின் புகைப்படங்களை வைத்துள்ளனர். ஓபிஎஸ்-ஸின் கோட்டையாகக் கருதப்பட்ட பெரியகுளம் பகுதியிலேயே அவரது ஆதரவாளர்கள் இவ்வாறு கட்சி மாறி வருவது, தமிழக அரசியலில் ஒரு முக்கிய திருப்புமுனையாகப் பார்க்கப்படுகிறது.