வரும் 2026 தமிழகச் சட்டமன்றத் தேர்தலில் நாம் தமிழர் கட்சிக்கு (NTK) நிபந்தனையற்ற ஆதரவு அளிப்பதாகத் தமிழ்த்தேசியப் பேரியக்கம் அதிகாரப்பூர்வமாக அறிவித்துள்ளது. கோபிசெட்டிப்பாளையத்தில் பிப்ரவரி 28 மற்றும் மார்ச் 1 ஆகிய தேதிகளில் நடைபெற்ற பேரியக்கத்தின் பத்தாவது சிறப்புப் பொதுக்குழு கூட்டத்தில் இதற்கான தீர்மானம் ஒருமனதாக நிறைவேற்றப்பட்டது. தமிழ்த் தேசிய அரசியலை முன்னிறுத்திச் செயல்படும் இரு அமைப்புகளும் இணைந்துள்ள இந்த முடிவு, அரசியல் வட்டாரத்தில் முக்கியத்துவம் வாய்ந்ததாகக் கருதப்படுகிறது.
தமிழ்த்தேசியப் பேரியக்கத்தின் தலைவர் பெ.மணியரசன் தலைமையில் நடைபெற்ற இந்த ஆலோசனைக் கூட்டத்தில், பொதுச்செயலாளர் கி.வெங்கட்ராமன் உள்ளிட்ட முக்கிய நிர்வாகிகள் கலந்துகொண்டனர். தமிழ்த் தேசியக் கொள்கைகளைப் பாதுகாக்கவும், மண்ணுரிமை மற்றும் மக்கள் நலனை முன்னிறுத்தவும் வரும் தேர்தலில் நாம் தமிழர் கட்சிக்கு வாக்களிக்க வேண்டும் எனத் தங்களது தொண்டர்களுக்கும் பொதுமக்களுக்கும் பேரியக்கம் அழைப்பு விடுத்துள்ளது.
தமிழ்த்தேசியப் பேரியக்கத்தின் இந்த முடிவை நாம் தமிழர் கட்சியின் தலைமை ஒருங்கிணைப்பாளர் சீமான் வரவேற்றுள்ளார். தேர்தலைத் தனித்துப் போட்டியிடப் போவதாக ஏற்கனவே அறிவித்திருந்த சீமானுக்கு, இந்த ஆதரவு பெரும் ஊக்கமாக அமைந்துள்ளது. இது தமிழ்த் தேசியக் கொள்கைக்காகத் தொடர்ந்து இயங்கி வரும் தங்களுக்குக் கிடைத்த பெரிய அங்கீகாரம் என்றும், தேர்தல் களத்தில் இது தங்களுக்கு கூடுதல் பலத்தைச் சேர்க்கும் என்றும் அவர் மகிழ்ச்சி தெரிவித்துள்ளார்.