2026-ஆம் ஆண்டு நடைபெறவுள்ள தமிழக சட்டமன்றத் தேர்தலை முன்னிட்டு அரசியல் களம் சூடுபிடித்துள்ள நிலையில், அதிமுக முன்னாள் எம்பி கே.சி.பழனிசாமி தனது எக்ஸ் (X) பக்கத்தில் எடப்பாடி பழனிசாமியின் தேர்தல் உத்திகளைக் கடுமையாக விமர்சித்துள்ளார். இந்தத் தேர்தலில் ஒருவேளை திமுக மீண்டும் வெற்றி பெற்றால், அதற்கு எடப்பாடி பழனிசாமியின் தவறான அரசியல் அணுகுமுறையே முழு முதற்காரணமாக இருக்கும் என்று அவர் அதிரடியாகத் தெரிவித்துள்ளார்.
அதிமுக கூட்டணியில் டிடிவி தினகரன் மற்றும் அன்புமணி ராமதாஸ் இணைந்தபோது ஒரு சாதகமான சூழல் உருவானதாகவும், ஆனால் அதைத் தொடர்ந்து தக்கவைக்க எடப்பாடி பழனிசாமி தவறிவிட்டதாகவும் அவர் சுட்டிக்காட்டியுள்ளார். திமுக தனது கூட்டணிக் குழப்பங்களைச் சரிசெய்து, ‘மகளிர் உரிமைத் தொகை 5,000 ரூபாய்’ போன்ற அதிரடி அறிவிப்புகளை வெளியிட்டு, தேமுதிகவை வளைத்து, ஓபிஎஸ்-ஐயும் தன் பக்கம் இழுத்து தேர்தல் பணிகளில் படுவேகமாகச் செயல்படுவதாக அவர் குறிப்பிட்டுள்ளார்.
ஓபிஎஸ் நிபந்தனையற்ற ஆதரவு தர முன்வந்தும் அவரை ஏற்க மறுத்த எடப்பாடியின் பிடிவாதம், தற்போது ஓபிஎஸ் திமுக பக்கம் சாயக் காரணமாகிவிட்டது என்று கே.சி.பழனிசாமி விமர்சித்துள்ளார். நான்கு முனைப் போட்டி நிலவும் இந்தத் தேர்தலில், ஒவ்வொரு சிறு வாக்கு வங்கியும் முக்கியம் என்பதை உணராமல், கூட்டணி சக்திகளைத் தட்டி கழிப்பது அதிமுகவின் வெற்றியைப் பாதிக்கும் என்றும், அண்ணாமலை மற்றும் செங்கோட்டையன் போன்றோருடன் ஏற்பட்ட மோதல்களும் கட்சிக்குப் பின்னடைவைத் தரும் என்றும் அவர் எச்சரித்துள்ளார்.
இறுதியாக, எடப்பாடி பழனிசாமி கட்சித் தலைமையை ஒரு அதிகாரப் போட்டியாகப் பார்க்காமல், ஆட்சியைப் பிடிப்பதையே இலக்காகக் கொண்டு செயல்பட வேண்டும் என அறிவுறுத்தியுள்ளார். திமுக மிகத் துல்லியமான கணக்குகளுடன் காய்களை நகர்த்தி வரும் வேளையில், அதிமுக தனது பிடிவாதத்தைக் கைவிட்டுச் செயல்படாவிட்டால், 2026 வெற்றி என்பது எட்டாக்கனியாகிவிடும் என்றும், அதன் விளைவுகளை எடப்பாடி பழனிசாமி சந்திக்க நேரிடும் என்றும் தனது பதிவில் அவர் ஆணித்தரமாகக் கூறியுள்ளார்.