2026 தமிழகச் சட்டமன்றத் தேர்தலை முன்னிட்டு, நாம் தமிழர் கட்சியின் தலைமை ஒருங்கிணைப்பாளர் சீமான் அவர்கள் சிவகங்கை மாவட்டத்தின் காரைக்குடி தொகுதியில் போட்டியிடப்போவதாக அறிவித்திருப்பது அரசியல் வட்டாரத்தில் பெரும் விவாதத்தை ஏற்படுத்தியுள்ளது. கடந்த 2016-ல் கடலூரிலும், 2021-ல் திருவொற்றியூரிலும் போட்டியிட்டு வெற்றி வாய்ப்பை இழந்த சீமான், இம்முறை மிகக் கவனமாகத் திட்டமிட்டு காரைக்குடியைத் தேர்வு செய்துள்ளார். திருச்சியில் நடைபெற்ற அக்கட்சியின் பிரம்மாண்ட மாநாட்டில் 234 தொகுதிகளுக்கான வேட்பாளர் பட்டியலை வெளியிட்ட அவர், தனது அரசியல் பயணத்தின் முக்கியத் திருப்புமுனையாக இந்தத் தொகுதியைக் கருதுகிறார்.
காரைக்குடி தொகுதியைச் சீமான் தேர்வு செய்ததற்குப் பின்னால் வலுவான அரசியல் காரணங்கள் இருப்பதாகக் கருதப்படுகிறது. குறிப்பாக, சிவகங்கை மாவட்டத்தின் இளையான்குடி அருகே உள்ள அரணையூர் சீமானின் சொந்த ஊராகும். தனது சொந்த மண்ணில் போட்டியிடுவது உணர்வுப்பூர்வமாகவும், அரசியல் ரீதியாகவும் தமக்குக் கூடுதல் பலம் சேர்க்கும் என அவர் நம்புகிறார். மேலும், கடந்த மக்களவைத் தேர்தலின் போது காரைக்குடி சட்டமன்றத் தொகுதிக்குட்பட்ட பகுதிகளில் நாம் தமிழர் கட்சி சுமார் 17 சதவீத வாக்குகளைப் பெற்றுத் தனது செல்வாக்கை நிரூபித்துள்ளது, சீமானின் இந்த முடிவுக்கு முக்கிய உந்துதலாக அமைந்துள்ளது.
மற்றொரு முக்கியக் காரணம், காரைக்குடி தொகுதியில் திராவிடக் கட்சிகளான திமுக மற்றும் அதிமுக ஆகியவை நேரடியாகக் களம் காண வாய்ப்பு குறைவு என்பதாகும். கடந்த காலங்களில் இத்தொகுதி பெரும்பாலும் காங்கிரஸ் கட்சிக்கே ஒதுக்கப்பட்டு வந்துள்ளது. இம்முறையும் திமுக கூட்டணியில் காங்கிரஸ் போட்டியிட வாய்ப்புள்ளதாலும், அதிமுக கூட்டணியில் இத்தொகுதி பாஜகவுக்கு ஒதுக்கப்படலாம் எனக் கருதப்படுவதாலும், பிரதான திராவிடக் கட்சிகளின் நேரடிப் போட்டியைத் தவிர்த்து எளிதாக வெற்றி பெற முடியும் என்பது சீமானின் கணக்காக உள்ளது. கடந்த முறை கமல்ஹாசன் கோவையில் கையாண்ட அதே வியூகத்தைச் சீமான் காரைக்குடியில் கையாளுவதாக அரசியல் விமர்சகர்கள் குறிப்பிடுகின்றனர்.
காரைக்குடி தொகுதியில் முக்குலத்தோர் மற்றும் முத்தரையர் சமூக மக்களின் வாக்குகள் கணிசமாக உள்ளன. இந்த வாக்கு வங்கிகளைக் கவர்வதோடு, இளைய தலைமுறையினரின் ஆதரவையும் ஒருங்கிணைத்துச் சட்டசபைக்குள் நுழைய வேண்டும் என்பதில் சீமான் உறுதியாக உள்ளார். தமிழக வெற்றிக் கழகம் உள்ளிட்ட புதிய கட்சிகளின் வரவு போட்டியை அதிகமாக்கினாலும், தனது சொந்த மாவட்ட செல்வாக்கு மற்றும் தொகுதியின் சாதகமான சூழல் தன்னைக் கரைசேர்க்கும் என சீமான் எதிர்பார்க்கிறார். 117 ஆண்கள் மற்றும் 117 பெண்கள் எனச் சமத்துவ அடிப்படையில் வேட்பாளர்களை அறிவித்துள்ள சீமானுக்கு, இந்த காரைக்குடி களம் வெற்றியைத் தருமா என்பதைப் பொறுத்திருந்துதான் பார்க்க வேண்டும்.