2026 தமிழக சட்டமன்றத் தேர்தலை முன்னிட்டு அரசியல் களம் சூடுபிடித்துள்ள நிலையில், திமுக கூட்டணியில் யாரும் எதிர்பாராத திருப்பமாக தேமுதிக இணைந்துள்ளது. கட்சி ஆரம்பித்து 20 ஆண்டுகளில் முதல்முறையாக திமுகவுடன் கூட்டணி அமைத்துள்ள தேமுதிகவுக்கு, 7 சட்டமன்றத் தொகுதிகளும் ஒரு மாநிலங்களவை (ராஜ்யசபா) இடமும் ஒதுக்கப்பட வாய்ப்புள்ளதாகத் தகவல்கள் வெளியாகியுள்ளன. சென்னை அண்ணா அறிவாலயத்தில் முதல்வர் ஸ்டாலினை பிரேமலதா விஜயகாந்த் சந்தித்ததைத் தொடர்ந்து இந்தத் தேர்தல் கூட்டணி உறுதியாகியுள்ளது.
தேமுதிகவின் இந்தத் திடீர் வருகை திமுக கூட்டணியில் நீண்டகாலமாக இருக்கும் மற்ற கட்சிகளிடையே சலசலப்பை ஏற்படுத்தியுள்ளது. குறிப்பாக, கடந்த தேர்தல்களில் குறைவான தொகுதிகளைப் பெற்ற விடுதலை சிறுத்தைகள் (விசிக) மற்றும் மதிமுக போன்ற கட்சிகள், தங்களை விட தேமுதிகவுக்கு அதிக முக்கியத்துவம் அளிக்கப்படுவதாகக் கருதுகின்றன. கடந்த சட்டமன்றத் தேர்தலில் தலா 6 இடங்களை மட்டுமே பெற்ற இந்தக் கட்சிகள், இப்போது கூடுதல் தொகுதிகளைக் கோரி திமுக தலைமைக்கு நெருக்கடி கொடுக்கத் தொடங்கியுள்ளன.
குறிப்பாக, மதிமுக பொதுச்செயலாளர் வைகோவுக்கு இந்த முறை மாநிலங்களவை இடம் வழங்கப்படாமல், அது தேமுதிகவுக்கு ஒதுக்கப்பட்டிருப்பது அக்கட்சியினரிடையே கடும் அதிருப்தியை ஏற்படுத்தியுள்ளது. பல ஆண்டுகளாக கூட்டணியில் உறுதியாக இருக்கும் தங்களை விட, புதிதாக வந்த தேமுதிகவுக்கு அதிக சலுகைகள் வழங்கப்படுவது நியாயமற்றது என கூட்டணிக் கட்சிகள் முணுமுணுக்கின்றன. இதனால் தொகுதிப் பங்கீட்டுப் பேச்சுவார்த்தையில் திமுகவுக்கு பெரும் சிக்கல் எழுந்துள்ளது.
ஏற்கனவே காங்கிரஸ், இடதுசாரிகள், மநிம எனப் பெரிய கூட்டணியை திமுக கொண்டுள்ள நிலையில், தேமுதிகவின் வருகை ‘ஓவர் லோடு’ ஆகிவிட்டதாக அரசியல் விமர்சகர்கள் கருதுகின்றனர். கூட்டணிக் கட்சிகளைத் திருப்திப்படுத்த திமுக தனது சொந்த தொகுதிகளின் எண்ணிக்கையைக் குறைக்க வேண்டிய கட்டாயத்திற்குத் தள்ளப்பட்டுள்ளது. இந்தத் தொகுதிப் பங்கீட்டு நெருக்கடிகளை முதல்வர் ஸ்டாலின் எவ்வாறு கையாண்டு கூட்டணியை ஒற்றுமையாகத் தேர்தலை நோக்கி அழைத்துச் செல்வார் என்பதே தற்போதைய எதிர்பார்ப்பாக உள்ளது.