வேலூர் அருகே விளையாட்டின் போது சேலை கழுத்தை இறுக்கி 9 வயது சிறுமி பரிதாபமாக உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது. விரிஞ்சிபுரம் அருகே உள்ள குடிசை கிராமத்தைச் சேர்ந்த பெட்ரோல் பங்க் ஊழியர் பழனி – சத்திய பிரியா தம்பதியரின் மகள் ஜீவிதா (9), அப்பகுதியில் உள்ள பள்ளியில் 4-ஆம் வகுப்பு படித்து வந்தார்.
சம்பவத்தன்று ஜீவிதாவின் தாய் சமையல் அறையில் வேலை செய்து கொண்டிருந்தபோது, சிறுமி தனது வீட்டின் ஜன்னலுக்கும் பக்கத்து வீட்டுக்கும் இடையே ஒரு சேலையை ஊஞ்சலாகக் கட்டி விளையாடியுள்ளார். அப்போது எதிர்பாராதவிதமாகச் சேலை சிறுமியின் கழுத்தை இறுக்கியுள்ளது. சத்தமிட முடியாமல் வலியால் துடித்த சிறுமி உதவி கோரி கைகளை அசைத்ததைக் கண்டு அக்கம் பக்கத்தினர் அவரை மீட்டு உடனடியாக அணைக்கட்டு ஆரம்ப சுகாதார நிலையத்திற்குக் கொண்டு சென்றனர்.
மருத்துவமனைக்குச் செல்லும் வழியிலேயே சிறுமி உயிரிழந்துவிட்டதாக மருத்துவர்கள் தெரிவித்தனர். இது குறித்து விரிஞ்சிபுரம் போலீசார் வழக்குப் பதிவு செய்து விசாரணை நடத்தி வருகின்றனர். குழந்தைகள் விளையாடும்போது பெரியவர்களின் கண்காணிப்பு எவ்வளவு அவசியம் என்பதை இந்தத் துயரச் சம்பவம் மீண்டும் ஒருமுறை வேதனையுடன் நினைவுபடுத்தியுள்ளது.