தமிழக அரசியலில் ‘ஆட்சியில் பங்கு’ என்ற அதிரடி முழக்கத்துடன் களம் இறங்கியுள்ள தமிழக வெற்றிக் கழகத்துடன் கூட்டணி அமைக்கப் பல கட்சிகள் தயக்கம் காட்டி வரும் நிலையில், ஒரு சுவாரசியமான திருப்பம் அரங்கேறியுள்ளது. புதுச்சேரியில் பாஜகவுடன் இணைந்து ஆட்சியிலிருக்கும் என்.ஆர்.காங்கிரஸ் தலைவர் ரங்கசாமி, தமிழகத்தில் மட்டும் தவெகவுடன் கூட்டணி வைக்கத் திட்டமிட்டுள்ளதாகத் தகவல்கள் கசிகின்றன. தொகுதிப் பங்கீடு தொடர்பாகப் பேச்சுவார்த்தை நடத்த வந்த புதுவை பாஜக பொறுப்பாளர் நிர்மல்குமார் சுரானாவிடம், ரங்கசாமி இந்த அதிரடி முடிவை வெளிப்படையாகத் தெரிவித்து அவருக்குப் பெரும் ‘ஷாக்’ கொடுத்துள்ளதாக அரசியல் வட்டாரங்களில் பரபரப்பாகப் பேசப்படுகிறது.
புதுச்சேரியில் பாஜகவின் முக்கியக் கூட்டாளியாக நீடிக்கும் ரங்கசாமி, தமிழக அரசியல் களத்தில் விஜய்யின் கரத்தை வலுப்படுத்த விரும்புவது தேசியக் கட்சிகளுக்குப் பின்னடைவாகப் பார்க்கப்படுகிறது. தமிழகத்தில் தார்மீக ஆதரவை விஜய்க்கு வழங்குவதன் மூலம், புதுவையில் தனது செல்வாக்கைத் தக்கவைத்துக்கொள்ளவும், அதே சமயம் திராவிடக் கட்சிகளுக்கு மாற்றாக ஒரு புதிய சக்தியுடன் கைகோர்க்கவும் அவர் கணக்குப் போடுவதாகத் தெரிகிறது. இதுவரை எந்தக் கட்சியும் தவெக பக்கம் வெளிப்படையாக வராத சூழலில், ரங்கசாமியின் இந்த முடிவு தமிழக மற்றும் புதுவை அரசியல் களத்தில் புதிய விவாதங்களையும், கூட்டணி மாற்றங்களையும் உருவாக்கும் என எதிர்பார்க்கப்படுகிறது.