2000-களின் தொடக்கத்தில் தமிழ் மற்றும் தெலுங்குத் திரையுலகில் வளர்ந்து வரும் நட்சத்திரமாகத் திகழ்ந்தவர் நடிகை பிரதியுஷா. நடிகர் விஜயகாந்துடன் ‘தவசி’, முரளியுடன் ‘மனுநீதி’ உள்ளிட்ட பல வெற்றிப் படங்களில் நடித்த அவர், கடந்த 2002-ம் ஆண்டு மர்மமான முறையில் உயிரிழந்தார். பிரதியுஷாவும் அவரது காதலர் சித்தார்த் ரெட்டியும் விஷம் அருந்தி தற்கொலைக்கு முயன்றதாகவும், இதில் சித்தார்த் உயிர் பிழைத்த நிலையில் பிரதியுஷா மட்டும் உயிரிழந்ததாகவும் கூறப்பட்டது. இச்சம்பவம் அப்போது பெரும் அதிர்வலைகளை ஏற்படுத்தியது.
இந்த வழக்கில் சித்தார்த் ரெட்டி மீது தற்கொலைக்குத் தூண்டியதாகக் குற்றம் சாட்டப்பட்டு, 2004-ல் கீழ் நீதிமன்றம் அவருக்கு 5 ஆண்டுகள் சிறைத்தண்டனை விதித்தது. பின்னர் 2011-ல் உயர் நீதிமன்றம் அந்தத் தண்டனையை 2 ஆண்டுகளாகக் குறைத்தது. இதனை எதிர்த்து பிரதியுஷாவின் தாயார் 2012-ல் உச்ச நீதிமன்றத்தில் மேல்முறையீடு செய்தார். சுமார் 14 ஆண்டுகள் நீடித்த இந்த சட்டப் போராட்டத்திற்குப் பிறகு, தற்போது 24 ஆண்டுகள் கழித்து உச்ச நீதிமன்றம் தனது இறுதித் தீர்ப்பை வழங்கியுள்ளது.
உச்ச நீதிமன்றம் தனது தீர்ப்பில், சித்தார்த் ரெட்டிக்கு விதிக்கப்பட்ட சிறைத்தண்டனையை உறுதி செய்ததுடன், அவரது மேல்முறையீட்டு மனுவைத் தள்ளுபடி செய்தது. மேலும், அடுத்த நான்கு வாரங்களுக்குள் அவர் நீதிமன்றத்தில் சரணடைய வேண்டும் என்றும் அதிரடி உத்தரவு பிறப்பித்துள்ளது. நீண்ட கால தாமதத்திற்குப் பிறகு வழங்கப்பட்டுள்ள இந்தத் தீர்ப்பு, சட்ட ரீதியாக ஒரு முக்கிய மைல்கல்லாகப் பார்க்கப்பட்டாலும், குற்றவாளிக்கு உரிய தண்டனை கிடைத்துள்ளதா என்ற விவாதத்தையும் கிளப்பியுள்ளது.
இந்தத் தீர்ப்பு குறித்து கருத்து தெரிவித்துள்ள பிரதியுஷாவின் தாயார், உச்ச நீதிமன்றத்தின் தீர்ப்பை மதிப்பதாகக் கூறினாலும், தமக்கு முழுமையான நீதி கிடைக்கவில்லை என்றே ஆதங்கப்படுகிறார். தனது மகள் தற்கொலை செய்து கொள்ளும் அளவிற்கு கோழை அல்ல என்றும், அவள் திட்டமிட்டு படுகொலை செய்யப்பட்டாள் என்பதே தனது மாறாத நம்பிக்கை என்றும் அவர் தெரிவித்துள்ளார். 24 ஆண்டுகால போராட்டத்திற்குப் பின்னரும், தன் மகளின் ஆன்மா சாந்தியடையவில்லை என்ற வேதனையுடனேயே அவர் காணப்படுகிறார்.