இந்தியாவில் உடல் பருமன் என்பது வெறும் தனிநபர் சார்ந்த பிரச்சனை மட்டுமல்ல, அது ஒரு தீவிரமான ‘தேசிய சுகாதார அவசரநிலை’ என்று சமீபத்திய ஆய்வுகள் எச்சரிக்கின்றன. ‘கிளினிக்கல் ஒபிசிட்டி’ (Clinical Obesity) இதழில் வெளியான ஆய்வறிக்கையின்படி, இந்தியாவில் மட்டும் சுமார் 25.4 கோடி மக்கள் பொதுவான உடல் பருமனால் பாதிக்கப்பட்டுள்ளதாக அதிர்ச்சியூட்டும் தகவல் வெளியாகியுள்ளது. இதனை ஒரு வாழ்க்கைமுறை மாற்றமாக மட்டும் பார்க்காமல், ஒரு நீண்டகால நோயாக (Chronic Disease) அதிகாரப்பூர்வமாக அங்கீகரிக்க வேண்டிய கட்டாயம் தற்போது ஏற்பட்டுள்ளது.
உடல் எடையைக் குறைப்பது எவ்வளவு சவாலானது என்பதை இந்த ஆய்வின் புள்ளிவிவரங்கள் அப்பட்டமாக விளக்குகின்றன. ஆய்வில் பங்கேற்றவர்களில் 84 சதவீதம் பேர் எடையைக் குறைக்க தீவிரமாக முயற்சி செய்த போதிலும், வெறும் 4.7 சதவீதத்தினரால் மட்டுமே தங்களது இலக்கை எட்டி, ஓராண்டுக்கும் மேலாக எடையைக் கட்டுக்குள் வைத்திருக்க முடிந்துள்ளது. உடல் பருமன் என்பது முறையான சிகிச்சை அளித்தாலும் மீண்டும் மீண்டும் வரக்கூடிய ஒரு சிக்கலான மருத்துவப் பிரச்சனை என்பதை இது உறுதிப்படுத்துகிறது.
தற்போதைய நிலவரப்படி, இந்தியாவில் 25.4 கோடி பேர் பொதுவான உடல் பருமனுடனும், சுமார் 35.1 கோடி பேர் வயிற்றுப்பகுதி பருமனுடனும் (Abdominal Obesity) வாழ்ந்து வருகின்றனர். குறிப்பாக, குழந்தைகளிடையே இந்தப் பாதிப்பு மிக வேகமாகப் பரவி வருவது எதிர்கால சந்ததியினரின் ஆரோக்கியம் குறித்த அச்சத்தை ஏற்படுத்தியுள்ளது. கடந்த 2019-ஆம் ஆண்டில் மட்டும் தொற்றாநோய்களால் ஏற்பட்ட சுமார் 5.79 லட்சம் உயிரிழப்புகளுக்குப் பின்னால், உடல் பருமன் தொடர்பான சிக்கல்கள் மறைமுகக் காரணமாக இருந்துள்ளது பேரதிர்ச்சியை அளிக்கிறது.
புகழ்பெற்ற நீரிழிவு நிபுணர் டாக்டர் வி.மோகன் உள்ளிட்ட மருத்துவ வல்லுநர்கள், இந்தச் சவாலை எதிர்கொள்ள அரசு உடனடி நடவடிக்கை எடுக்க வேண்டும் என வலியுறுத்துகின்றனர். சத்தான உணவுகளுக்கு மானியம் வழங்குவது, உடற்பயிற்சிக் கூடங்களை பரவலாக்குவது மற்றும் பதப்படுத்தப்பட்ட உணவுகள் மீதான கட்டுப்பாடுகளைத் தீவிரப்படுத்துவது மட்டுமே தீர்வாக அமையும். தனிமனித விழிப்புணர்வுடன் அரசின் ஒருங்கிணைந்த செயல்பாடுகள் இருந்தால் மட்டுமே இந்தியாவின் எதிர்கால ஆரோக்கியத்தை இந்த ‘மரணப் பரிசிடமிருந்து’ காப்பாற்ற முடியும்.