2026 தமிழக சட்டமன்றத் தேர்தலுக்கான அரசியல் களம் தற்போதே சூடுபிடிக்கத் தொடங்கியுள்ளது. ஆளும் திமுக தலைமையிலான கூட்டணியில் அங்கம் வகிக்கும் வைகோ தலைமையிலான மறுமலர்ச்சி திராவிட முன்னேற்றக் கழகம், இந்த முறை கணிசமான எண்ணிக்கையிலான தொகுதிகளைப் பெற்று தனது பலத்தை நிரூபிக்கத் திட்டமிட்டுள்ளது. கடந்த தேர்தல்களை விட கூடுதல் இடங்களைக் கோர முடிவு செய்துள்ள அக்கட்சி, தற்போது முதற்கட்டமாக 16 தொகுதிகள் அடங்கிய உத்தேசப் பட்டியலைத் தயார் செய்துள்ளதாகத் தகவல்கள் வெளியாகியுள்ளன.
இந்த உத்தேசப் பட்டியலில் மதிமுகவின் முக்கியப் பிரமுகர்கள் போட்டியிடுவதற்கான தொகுதிகள் அடையாளம் காணப்பட்டுள்ளன. குறிப்பாக, சிங்காநல்லூர், பல்லடம் அல்லது கிணத்துக்கடவு ஆகிய தொகுதிகளில் ஒன்றை அர்ஜுன் ராஜுக்காகவும், கடலூர் அல்லது புவனகிரி தொகுதியை அக்கட்சியின் பொருளாளர் செந்தில் அதியமானுக்காகவும் கேட்க முடிவு செய்யப்பட்டுள்ளது. மேலும், ஏற்கனவே மதிமுக வசம் இருந்த மதுரை தெற்கு, சாத்தூர் மற்றும் வாசுதேவநல்லூர் போன்ற தொகுதிகளையும் மீண்டும் தங்களுக்கு ஒதுக்க வேண்டும் என்பதில் அக்கட்சி உறுதியாக உள்ளது.
தென் மாவட்டங்களில் செல்வாக்கை நிலைநாட்ட வைகோவின் சொந்த ஊரான கோவில்பட்டியில் ஆர். ரமேஷையும், கடையநல்லூர் தொகுதியில் தி.மு. ராஜேந்திரனையும் நிறுத்த மதிமுக திட்டமிட்டுள்ளது. இது தவிர பாளையங்கோட்டை, திருச்சி கிழக்கு அல்லது மணப்பாறை, விருதுநகர் அல்லது சிவகாசி, சீர்காழி போன்ற தொகுதிகளையும் திமுகவிடம் கேட்டுப் பெற அக்கட்சி உத்தேசப் பட்டியல் தயாரித்துள்ளது. தங்களின் செல்வாக்கு உள்ள பகுதிகளில் போட்டியிடுவதன் மூலம் வெற்றியை உறுதி செய்ய முடியும் என மதிமுக தலைமை நம்புகிறது.
திமுகவுடனான அதிகாரப்பூர்வத் தொகுதிப் பங்கீட்டுப் பேச்சுவார்த்தை வரும் பிப்ரவரி 21-ஆம் தேதி தொடங்கும் என எதிர்பார்க்கப்படுகிறது. இந்தப் பேச்சுவார்த்தையின் போது மதிமுக தனது கோரிக்கைகளை முன்வைக்கும். திமுக தரப்பில் ஒதுக்கப்படும் இடங்களின் எண்ணிக்கையைப் பொறுத்தே வேட்பாளர்கள் மற்றும் தொகுதிகள் இறுதி செய்யப்படும். நான்கு முனைப் போட்டி நிலவும் இந்தத் தேர்தலில், கூட்டணியில் கௌரவமான இடங்களைப் பெற்று வெற்றி வாகை சூட மதிமுக மும்முரமாகத் தயாராகி வருகிறது.