அதிமுக முன்னாள் அமைச்சர் திண்டுக்கல் சீனிவாசன், அதிமுகவிலிருந்து பிரிந்து சென்று தமிழக வெற்றிக் கழகத்தில் (தவெக) இணைந்த கே.ஏ. செங்கோட்டையன் குறித்து மிகுந்த மனவேதனையுடனும் ஆதங்கத்துடனும் பேசியுள்ளார். 50 ஆண்டு கால அரசியல் அனுபவம் கொண்ட ஒரு மூத்த தலைவர், இன்று தனது நிலையைத் தாழ்த்திக் கொண்டுள்ளதாக அவர் விமர்சித்துள்ளார் . அதிமுகவில் அமைச்சராகவும், கட்சியின் முக்கியத் தூணாகவும் முதலிடத்தில் இருந்த செங்கோட்டையன், தற்போது தவெக-வில் 4-வது அல்லது 5-வது இடத்திற்குத் தள்ளப்பட்டுள்ளார் என திண்டுக்கல் சீனிவாசன் சுட்டிக்காட்டினார். இதனை ஒரு “தாழ்ந்த நிலை” என்று குறிப்பிட்ட அவர், இதற்காகத் தான் கண்ணீர் விடுவதாகத் தெரிவித்தார்.
தவெக தலைவர் விஜய்க்கு ‘புரட்சி தளபதி’ என்ற பட்டத்தை வழங்க வேண்டும் என்று செங்கோட்டையன் கூறியதை நினைத்து வருந்துவதாகவும், இவ்வளவு கீழ்த்தரமாக அவர் செல்வார் என்று எதிர்பார்க்கவில்லை என்றும் சீனிவாசன் குறிப்பிட்டார். அதிமுக, பாஜக கூட்டணியில் ஒரு அங்கமாக இருப்பதாகக் கூறப்படும் விமர்சனங்களுக்குப் பதிலளித்த அவர், ஒரு காலத்தில் தங்களுடன் கைகோர்த்து நின்ற பெரிய மனிதர் இப்போது தடம் மாறிச் சென்றது துரதிர்ஷ்டவசமானது என்றார். செங்கோட்டையனைத் தாளம் மற்றும் தாம்பாளத்துடன் ஒப்பிட்டுப் பேசிய அவர், தங்களுக்கு என்று ஒரு தகுதி இருப்பதாகவும், அண்ணன் செங்கோட்டையன் இப்போது அந்தத் தகுதியை இழந்து டம் டம் என்று அடிக்கும் நிலைக்கு வந்துவிட்டதாகவும் விமர்சித்தார்