தமிழகத்தில் சட்டமன்றத் தேர்தல் களம் சூடுபிடித்துள்ள நிலையில், முன்னணி செய்தி நிறுவனமான நியூஸ் 18 வெளியிட்டுள்ள புதிய கருத்துக்கணிப்பு அரசியல் வட்டாரங்களில் பெரும் பரபரப்பை ஏற்படுத்தியுள்ளது. இந்த கணிப்பின்படி, ஆளுங்கட்சியான திமுக 35.8 சதவீத வாக்குகளுடன் முதலிடத்தைப் பிடிக்கும் என்று கணிக்கப்பட்டுள்ளது. திமுகவுக்கு மிக நெருக்கமாக எதிர்க்கட்சியான அதிமுக கூட்டணி 33.8 சதவீத வாக்குகளைப் பெற்று கடும் போட்டியை வழங்கும் என்று தெரிவிக்கப்பட்டுள்ளது. இரு திராவிடக் கட்சிகளுக்கும் இடையே வெறும் 2 சதவீத வாக்கு வித்தியாசம் மட்டுமே இருப்பது, வரும் தேர்தலில் நிலவும் பலப்பரீட்சையை உறுதிப்படுத்துகிறது.
இந்தக் கருத்துக்கணிப்பின் மிக முக்கியமான அம்சமாக நடிகர் விஜய்யின் தமிழக வெற்றிக் கழகம் (தவெக) உருவெடுத்துள்ளது. கட்சி தொடங்கப்பட்ட குறுகிய காலத்திலேயே 19.2 சதவீத வாக்கு வங்கியை விஜய் வசப்படுத்துவார் என நியூஸ் 18 கணித்துள்ளது. சுமார் 20 சதவீத வாக்குகளை தவெக ஈர்க்கும் பட்சத்தில், தமிழக அரசியலில் ஒரு பலமான மூன்றாவது சக்தியாக விஜய் உருவெடுப்பார் என்பதும், தேர்தலுக்குப் பிந்தைய சூழலில் அவர் ஒரு ‘கிங் மேக்கராக’ மாற வாய்ப்புள்ளதும் இந்த முடிவுகளின் மூலம் தெரியவருகிறது.
அடுத்த முதலமைச்சர் யார் என்ற கேள்விக்கு மக்கள் அளித்துள்ள பதில்களும் சுவாரசியமாக அமைந்துள்ளன. தற்போதைய முதலமைச்சர் மு.க.ஸ்டாலின் 33.3 சதவீத ஆதரவுடன் முதலிடத்தில் நீடிக்கிறார். அவருக்கு அடுத்தபடியாக எடப்பாடி பழனிசாமி 29.8 சதவீத ஆதரவையும், விஜய் 23.2 சதவீத ஆதரவையும் பெற்றுள்ளனர். சீமானின் நாம் தமிழர் கட்சி மற்றும் சுயேச்சை வேட்பாளர்கள் இணைந்து 6.5 சதவீத வாக்குகளைப் பெறுவார்கள் என்று கணிக்கப்பட்டுள்ளது. முதலமைச்சர் வேட்பாளர் தரவரிசையில் விஜய் மூன்றாவது இடத்தைப் பிடித்திருப்பது, இளைஞர்கள் மற்றும் பெண்கள் மத்தியில் அவருக்கு இருக்கும் செல்வாக்கை பிரதிபலிக்கிறது.
தற்போது தமிழகத்தில் திமுக, அதிமுக, தவெக மற்றும் நாதக என நான்கு முனைப் போட்டி நிலவும் சூழல் உருவாகியுள்ளது. இன்னும் அதிகாரப்பூர்வ பிரச்சாரங்கள், தேர்தல் அறிக்கைகள் மற்றும் வேட்பாளர் அறிமுகங்கள் முழுமையாக நடைபெறாத நிலையில், இந்தக் கருத்துக்கணிப்பு முடிவுகள் கட்சிகளுக்கு ஒரு திசைகாட்டியாக அமைந்துள்ளன. குறிப்பாக, விஜய்யின் வருகை திராவிடக் கட்சிகளின் வாக்கு வங்கியில் எந்த அளவுக்கு மாற்றத்தை ஏற்படுத்தும் என்பதே தற்போது தமிழக அரசியலின் மில்லியன் டாலர் கேள்வியாக மாறியுள்ளது.