2026 தமிழக சட்டமன்றத் தேர்தல் களம் சூடுபிடிக்கத் தொடங்கியுள்ள நிலையில், திமுக கூட்டணியில் தொகுதிப் பங்கீடு தொடர்பான சலசலப்புகள் வெடிக்கத் தொடங்கியுள்ளன. குறிப்பாக, தமிழக வாழ்வுரிமை கட்சித் தலைவர் வேல்முருகன், திமுகவின் தொகுதி ஒதுக்கீடு அணுகுமுறை குறித்து கடும் அதிருப்தியை வெளிப்படுத்தியுள்ளார். வட மாவட்டங்களில் பாமகவிற்கு இணையான கட்டமைப்பைக் கொண்டுள்ள தங்களையும், கமல்ஹாசனின் மக்கள் நீதி மய்யம் மற்றும் இதர சிறிய கட்சிகளையும் ஒரே தராசில் வைத்துப் பார்ப்பது நியாயமற்றது என்பதே வேல்முருகன் தரப்பின் பிரதான குற்றச்சாட்டாக உள்ளது.
கடந்த 2019 முதல் திமுக கூட்டணியில் நீடித்து வரும் வேல்முருகன், கடந்த தேர்தல்களில் தாங்கள் கேட்ட தொகுதிகள் வழங்கப்படவில்லை என ஆதங்கப்படுகிறார். 2021 சட்டமன்றத் தேர்தலில் ஒரே ஒரு தொகுதியை மட்டும் வழங்கிய திமுக, வரும் 2026 தேர்தலிலும் அதே எண்ணிக்கையைப் பராமரிக்க முயல்வது தங்களை அவமானப்படுத்துவதாக அவர் கருதுகிறார். வட மாவட்டங்களில் தங்கள் கட்சி பெற்றுள்ள செல்வாக்கையும், திமுகவின் வெற்றிக்காகத் தங்கள் வாக்கு வங்கியை முழுமையாக மடைமாற்றியுள்ளதையும் திமுக தலைமை கருத்தில் கொள்ள வேண்டும் என அவர் வலியுறுத்துகிறார்.
அண்மையில் தேமுதிக மற்றும் மக்கள் நீதி மய்யம் ஆகிய கட்சிகளுக்கு அதிக முக்கியத்துவம் கொடுத்து திமுக பேச்சுவார்த்தை நடத்தி வருவதாகத் தகவல்கள் வெளியாகியுள்ளன. வெறும் 0.4 சதவீத வாக்கு வங்கி கொண்ட தேமுதிகவிற்கு 6 முதல் 8 தொகுதிகள் வரை ஒதுக்க முன்வரும் திமுக, களத்தில் தீவிரமாகப் பணியாற்றும் தங்களுக்கு உரிய அங்கீகாரம் அளிக்க மறுப்பது ஏன் என்று வேல்முருகன் கேள்வி எழுப்புகிறார். “கமல்ஹாசனும் நாங்களும் ஒன்றா? மற்ற சிறிய கட்சிகளைப் போல எங்களை அணுகுவது எந்த விதத்தில் நியாயம்?” என்று அவர் தரப்பினர் கொந்தளிக்கின்றனர்.
திமுக கூட்டணியில் விசிக, கம்யூனிஸ்ட் போன்ற கட்சிகளுக்கே தொகுதிகளை உயர்த்திக் கொடுக்கத் தயங்கும் வேளையில், புதிதாக வரும் கட்சிகளுக்கு அள்ளிக்கொடுக்கத் துடிப்பது கூட்டணியில் விரிசலை ஏற்படுத்தக்கூடும் என அரசியல் விமர்சகர்கள் கருதுகின்றனர். ஆட்சிக்கு ஐந்து ஆண்டுகள் உறுதுணையாக இருந்த கட்சிகளைப் புறக்கணிப்பது தேர்தலுக்கு முன்பாகப் பின்னடைவை ஏற்படுத்தலாம். இந்த அதிருப்திக் குரல்களையும், தொகுதிப் பங்கீட்டுச் சிக்கல்களையும் முதல்வர் ஸ்டாலின் எப்படிச் சமாளிக்கப் போகிறார் என்பது வரும் நாட்களில் தெரியவரும்.