அதிமுக-வின் முன்னாள் பொதுச்செயலாளர் சசிகலா, தமிழகத்தில் திமுக ஆட்சியை அகற்றி, எம்.ஜி.ஆர் மற்றும் ஜெயலலிதாவின் வழியில் மீண்டும் மக்கள் ஆட்சியை அமைப்பதே தனது லட்சியம் என மதுரையில் செய்தியாளர்களிடம் தெரிவித்துள்ளார். 39 ஆண்டுகால அரசியல் அனுபவத்தைக் கொண்டுள்ள தம்மால், தற்போதைய அரசியல் சூழலில் என்ன செய்ய முடியுமோ அதை நிச்சயம் செய்து, தமிழக மக்களின் நலனைக் காக்கப் போவதாக அவர் உறுதிபடக் கூறியுள்ளார்.
வரும் 2026 சட்டமன்றத் தேர்தலை முன்னிறுத்திப் பேசிய அவர், திமுக அரசாங்கத்தை ஆட்சியில் இருந்து விரட்டி அடிப்பதே தனது பிரதான இலக்கு எனத் தெரிவித்துள்ளார். தொண்டர்கள் அனைவரும் ஒன்றிணைந்து செயல்பட வேண்டும் என்றும், ஜெயலலிதா காட்டிய பாதையில் அதிமுக-வை மீண்டும் அரியணையில் அமர்த்தப் போவதாகவும் அவர் இந்தப் பேட்டியின் போது வலியுறுத்தியுள்ளார்.