2026-ஆம் ஆண்டுக்கான மத்திய பட்ஜெட்டைத் தாக்கல் செய்த நிதியமைச்சர் நிர்மலா சீதாராமன், தமிழக முதல்வர் மு.க. ஸ்டாலின் தலைமையிலான திமுக அரசு ஏற்கனவே செயல்படுத்தி வரும் சில முக்கிய திட்டங்களை முன்னுதாரணமாகக் கொண்டு தேசிய அளவிலான அறிவிப்புகளை வெளியிட்டுள்ளார். குறிப்பாக, தமிழகத்தில் பெரும் வரவேற்பைப் பெற்ற ‘தோழி’ விடுதிகள் திட்டத்தைப் போலவே, நாடு முழுவதும் ஒவ்வொரு மாவட்டத்திலும் பணிபுரியும் பெண்களுக்காகத் தங்கும் விடுதிகள் அமைக்கப்படும் என்ற அறிவிப்பு அனைவரது கவனத்தையும் ஈர்த்துள்ளது.
பெண்களுக்கான விடுதி திட்டத்தைத் தவிர்த்து, தமிழகத்தின் வரலாற்றுச் சிறப்புமிக்க ஆதிச்சநல்லூர் அகழ்வாராய்ச்சி மற்றும் கலாச்சாரப் பெருமைகளைப் பறைசாற்றும் வகையிலான முன்னெடுப்புகளும் பட்ஜெட்டில் இடம்பெற்றுள்ளன. தமிழக அரசின் நிர்வாகப் பாணியைப் பின்பற்றி, பெண்கள் மேம்பாடு மற்றும் தொல்லியல் துறை சார்ந்த அறிவிப்புகளை நிர்மலா சீதாராமன் கையில் எடுத்திருப்பது, மத்திய அரசு மாநில அரசுகளின் வெற்றிகரமான திட்டங்களைக் கவனிக்கத் தொடங்கியுள்ளதைக் காட்டுகிறது.
பொருளாதார வளர்ச்சியை மையமாகக் கொண்டு தயாரிக்கப்பட்டுள்ள இந்த பட்ஜெட்டில், செமி கண்டக்டர் துறைக்கு 40,000 கோடி ரூபாயும், பயோ பார்மா சக்தி திட்டத்திற்கு 10,000 கோடி ரூபாயும் ஒதுக்கீடு செய்யப்பட்டுள்ளது. மேலும், வெளிநாடு வாழ் இந்தியர்களுக்கான முதலீட்டு வரம்பு 5 சதவீதத்தில் இருந்து 10 சதவீதமாக உயர்த்தப்பட்டுள்ளதோடு, ஆயுர்வேத மருந்துகளின் ஏற்றுமதியை ஊக்குவிக்கத் தனி மையங்கள் அமைக்கப்படும் என்றும் உறுதியளிக்கப்பட்டுள்ளது.
தைப்பூசத் திருநாளில் தாக்கல் செய்யப்பட்ட இந்த பட்ஜெட், தமிழகத்தின் பாரம்பரிய கலாச்சாரத்திற்கும், நவீன உள்கட்டமைப்பு வளர்ச்சிக்கும் சமமான முக்கியத்துவம் அளிப்பதாக அமைந்துள்ளது. தமிழக அரசின் ‘ஸ்டாலின் ஸ்டைல்’ திட்டங்களை தேசிய அளவில் விரிவுபடுத்தும் இந்த முயற்சி, கூட்டாட்சி தத்துவத்தின் அடிப்படையில் மாநிலங்களின் நல்ல திட்டங்களை மத்திய அரசு ஏற்றுக்கொள்வதற்கான ஒரு ஆரோக்கியமான அடையாளமாகப் பார்க்கப்படுகிறது.