திமுக தலைமையிலான தற்போதைய தமிழக அரசை விமர்சிக்கும் வகையில் அதிமுக பொதுச்செயலாளர் எடப்பாடி பழனிசாமி ‘விடியா ஆட்சி – உங்கள் வீட்டு பில்-லே சாட்சி’ என்ற புதிய தேர்தல் பிரசார முழக்கத்தை அறிவித்துள்ளார். தமிழகத்தில் உயர்ந்து வரும் மின்சாரக் கட்டணம், சொத்து வரி உயர்வு மற்றும் அத்தியாவசியப் பொருட்களின் விலை உயர்வு ஆகியவற்றால் சாமானிய மக்கள் கடுமையாகப் பாதிக்கப்பட்டுள்ளதைச் சுட்டிக்காட்டும் வகையில் இந்தப் பிரசாரம் முன்னெடுக்கப்பட்டுள்ளது. நிர்வாகத் திறனற்ற இந்த ஆட்சியால் மக்கள் படும் துயரங்களை ஒவ்வொரு வீட்டிற்கும் கொண்டு செல்வதே அதிமுகவின் நோக்கம் என்று எடப்பாடி பழனிசாமி தனது அறிக்கையில் குறிப்பிட்டுள்ளார்.
இந்த விழிப்புணர்வு பிரசாரத்திற்காக ‘AIADMK Connect’ என்ற பிரத்யேக செயலி மற்றும் கையடக்க பிரிண்டர்களை அதிமுக தொண்டர்கள் பயன்படுத்த உள்ளனர். இதன் மூலம் கடந்த அதிமுக ஆட்சிக் காலத்தின் வரி விகிதங்களையும், தற்போதைய திமுக ஆட்சியின் கூடுதல் வரிச் சுமைகளையும் ஒப்பிட்டு, பொதுமக்களுக்கு அச்சிடப்பட்ட ஆதாரங்களை வழங்கத் திட்டமிட்டுள்ளனர். முதற்கட்டமாக மாநகராட்சி மற்றும் நகராட்சிப் பகுதிகளில் தொடங்கப்படும் இந்தப் பணி, பின்னர் பேரூராட்சி மற்றும் கிளை வாரியாகத் தீவிரப்படுத்தப்படும் என்றும், திமுக அரசை வீட்டுக்கு அனுப்ப அதிமுகவினர் ஒருங்கிணைந்து பணியாற்ற வேண்டும் என்றும் அவர் வேண்டுகோள் விடுத்துள்ளார்.