சாதாரண நடுத்தர மக்கள் மற்றும் சிறு முதலீட்டாளர்களின் சேமிப்புப் பழக்கத்தை ஊக்குவிக்கும் வகையில் இந்திய அஞ்சல் துறை ‘தேசிய சேமிப்பு தொடர் வைப்பு’ (RD) திட்டத்தை செயல்படுத்தி வருகிறது. மத்திய அரசின் முழுமையான ஆதரவுடன் செயல்படும் இத்திட்டம், சந்தை அபாயங்கள் ஏதுமின்றி பாதுகாப்பான மற்றும் உறுதியான வருமானத்தை வழங்குகிறது. குறிப்பாக, பங்குச் சந்தை போன்ற ஏற்ற இறக்கங்கள் இல்லாத முதலீட்டை விரும்புவோருக்கு இது ஒரு மிகச்சிறந்த நிதித் தேர்வாக அமைகிறது.
இந்தத் திட்டத்தின் சிறப்பம்சமே இதன் குறைந்தபட்ச முதலீட்டுத் தொகைதான். வெறும் 100 ரூபாய் முதலீட்டில் இந்தக் கணக்கை யார் வேண்டுமானாலும் தொடங்கலாம். 100 ரூபாய்க்கு மேல் 10-ன் மடங்குகளில் எவ்வளவு தொகையை வேண்டுமானாலும் மாதந்தோறும் முதலீடு செய்யலாம்; இதற்கு அதிகபட்ச வரம்பு ஏதும் கிடையாது. தற்போது அஞ்சல் துறை இந்த ஆர்டி திட்டத்திற்கு ஆண்டுக்கு 6.7 சதவீத வட்டியை வழங்குகிறது. இந்த வட்டியானது மூன்று மாதங்களுக்கு ஒருமுறை கூட்டு வட்டி முறையில் கணக்கிடப்படுவதால், முதலீட்டாளர்களுக்கு கூடுதல் லாபம் கிடைக்கிறது.
தனிநபர்கள் மட்டுமின்றி, 10 வயதுக்கு மேற்பட்ட சிறுவர்கள் தங்களின் பெயரிலேயே இந்தக் கணக்கைத் தொடங்கி நிர்வகிக்க முடியும். மேலும், இரண்டு அல்லது மூன்று நபர்கள் இணைந்து கூட்டுக் கணக்காகவும் (Joint Account) இதனைத் தொடங்கலாம். இந்தக் கணக்கின் முதிர்வு காலம் 5 ஆண்டுகள் (60 மாதங்கள்) ஆகும். அஞ்சலக சேமிப்புக் கணக்கு வைத்திருப்பவர்கள், ‘ஆட்டோ டெபிட்’ வசதி மூலம் தங்கள் கணக்கிலிருந்து தானாகவே பணம் செலுத்தும் முறையையும் பயன்படுத்திக் கொள்ளலாம்.
உதாரணமாக, ஒருவர் மாதம் 2,000 ரூபாய் வீதம் 5 ஆண்டுகளுக்கு முதலீடு செய்கிறார் எனில், அவர் செலுத்தும் மொத்தத் தொகை 1.20 லட்சம் ரூபாயாக இருக்கும். தற்போதைய வட்டி விகிதத்தின்படி, 5 ஆண்டுகள் கழித்து அவருக்கு முதிர்வுத் தொகையாக சுமார் 1,42,732 ரூபாய் கிடைக்கும். இதில் வட்டி வருமானம் மட்டுமே சுமார் 22,732 ரூபாயாகும். மிகக் குறைந்த முதலீட்டில் எதிர்காலத் தேவைகளுக்காகப் பெரிய தொகையைச் சேமிக்க விரும்புவோருக்கு இந்த அஞ்சலகத் திட்டம் ஒரு வரப்பிரசாதமாகும்.