தமிழக வெற்றிக் கழகத்தின் (தவெக) செயல் வீரர்கள் கூட்டத்தில் பேசிய அக்கட்சியின் தலைவர் விஜய், வரவிருக்கும் தேர்தலில் தவெக தனித்துப் போட்டியிடத் தயாராக இருப்பதை உறுதிப்படுத்தும் வகையில் உரையாற்றியுள்ளார். எத்தனை பேர் அணி திரண்டு வந்து நம்மை எதிர்த்தாலும், கொள்கை பலத்தோடு தனியாக வரும் தங்களை வெற்றி பெறச் செய்யத் தமிழக மக்கள் ஏற்கனவே மனதளவில் தயாராகிவிட்டதாக அவர் நம்பிக்கையுடன் தெரிவித்தார். விஜய்யின் இந்த அதிரடிப் பேச்சு, தமிழக அரசியலில் பெரும் சலசலப்பை ஏற்படுத்தியுள்ளது.
மேலும், இந்தியத் தேர்தல் ஆணையம் தவெக-விற்கு ஒதுக்கியுள்ள ‘விசில்’ சின்னத்தை தமிழகத்தின் பட்டிதொட்டியெங்கும் கொண்டு சேர்க்க வேண்டியது தொண்டர்களின் கடமை என்று அவர் அறிவுறுத்தினார். ஒவ்வொரு வீட்டிலும் விசில் சின்னம் ஒலிக்க வேண்டும் என்றும், 2026-ல் தவெக ஆட்சி அமைப்பது உறுதி என்றும் அவர் தொண்டர்களிடையே முழங்கினார். விஜய்யின் இந்தத் திட்டவட்டமான அறிவிப்பு, தவெக மற்ற கட்சிகளுடன் கூட்டணி வைக்காமல் தனித்து களம் காண்பதை உறுதி செய்துள்ளதாக அரசியல் நோக்கர்கள் கருத்து தெரிவித்துள்ளனர்.