தமிழகத்தின் கடலோர மற்றும் உள் மாவட்டங்களில் மீண்டும் மழை பெய்யத் தொடங்கியுள்ளது. இதன் காரணமாக, இன்று செங்கல்பட்டு, விழுப்புரம், கடலூர் மற்றும் மயிலாடுதுறை ஆகிய நான்கு மாவட்டங்களில் பலத்த மழை பெய்யக்கூடும் என்பதால் மஞ்சள் அலர்ட் விடுக்கப்பட்டுள்ளது. விடுமுறை தினமான இன்று வெளியே செல்லும் பொதுமக்கள் குடை அல்லது மழைக்கோட்டுகளை எடுத்துச் செல்ல அறிவுறுத்தப்படுகிறார்கள்.
அதேபோல், நாளை (ஜனவரி 25, 2026) மழையின் தாக்கம் மேலும் அதிகரித்து, செங்கல்பட்டு, திருவண்ணாமலை, விழுப்புரம், கள்ளக்குறிச்சி, கடலூர், சேலம், நாமக்கல், தஞ்சாவூர் மற்றும் ராமநாதபுரம் ஆகிய 9 மாவட்டங்களில் கனமழை பெய்ய வாய்ப்புள்ளதாக சென்னை வானிலை ஆய்வு மையம் தெரிவித்துள்ளது. தொடர் மழை காரணமாகத் தாழ்வான பகுதிகளில் நீர் தேங்க வாய்ப்புள்ளதால், வாகன ஓட்டிகள் மிகுந்த கவனத்துடன் இருக்குமாறு கேட்டுக்கொள்ளப்படுகிறார்கள்.