சுவிட்சர்லாந்தில் நடைபெற்ற உலக பொருளாதார மன்றக் கூட்டத்தில் பேசிய கனடா பிரதமர் மார்க் கார்னி, அமெரிக்காவின் உலகளாவிய ஆதிக்கம் முடிவுக்கு வந்துவிட்டதாக அதிரடியாகத் தெரிவித்தார். வளர்ச்சியைப் பகிர்ந்து கொள்வதாகக் கூறி வந்த வல்லரசு நாடுகள், தற்போது சர்வதேச வர்த்தக விதிகளைத் தங்களுக்குச் சாதகமாக மாற்றிக்கொண்டு மற்ற நாடுகளை மிரட்டும் ஆயுதமாகப் பயன்படுத்துகின்றனர் என்று அவர் பகிரங்கமாகக் குற்றம் சாட்டினார்.
பழைய உலக ஒழுங்குமுறை இனி ஒருபோதும் திரும்ப வராது என்றும், சர்வதேச அமைப்புகள் பலவீனமடைந்துள்ளதால் நாடுகள் சுயமாகச் செயல்பட வேண்டியது அவசியம் என்றும் அவர் எச்சரித்தார். அமெரிக்காவின் பெயரை நேரடியாகக் குறிப்பிடாமல் அதன் தன்னிச்சையான போக்கை விமர்சித்த கார்னி, இனி வரும் காலங்களில் எந்தவொரு நாட்டையும் அதிகம் சார்ந்திராமல் கனடா தனது சொந்தத் திறன்களை வலுப்படுத்தும் என்று கூறினார்.
மிரட்டல் மற்றும் பொருளாதார நெருக்கடிகள் மூலம் பிற நாடுகளைக் கட்டுப்படுத்த முயலும் போக்கு சர்வதேச பாதுகாப்பிற்கு ஆபத்தானது என்று கவலை தெரிவித்தார். இந்தப் பேச்சால் அதிருப்தியடைந்த அமெரிக்கா, காசா அமைதிக் குழுவில் சேர கனடாவுக்கு விடுத்திருந்த அழைப்பை உடனடியாகத் திரும்பப் பெற்றது உலக அரங்கில் பெரும் சலசலப்பை ஏற்படுத்தியுள்ளது.