குருநாகல் மாவட்டத்தின் கிரியுல்ல பகுதியில், 19 நாட்களே ஆன பச்சிளம் குழந்தையுடன் கிணற்றில் குதித்து தற்கொலைக்கு முயன்ற பட்டதாரித் தாயை போலீசார் கைது செய்துள்ளனர். இச்சம்பவத்தில் குழந்தை பரிதாபமாக உயிரிழந்த நிலையில், தாய் அங்குள்ள குழாய் ஒன்றின் உதவியுடன் உயிர் பிழைத்துள்ளார். சம்பவத்தின் போது வீட்டில் கணவரும் இருந்ததாகவும், திடீரென சத்தம் கேட்டு அவர் ஓடிச் சென்று பார்த்தபோதே தனது மனைவியும் குழந்தையும் கிணற்றில் விழுந்திருப்பதை கண்டு அதிர்ச்சியடைந்ததாகவும் விசாரணையில் தெரியவந்துள்ளது.
இந்த துயரமான சம்பவத்திற்குப் பின்னால் தம்பதியினருக்குள் எந்தவித குடும்பத் தகராறுகளும் இருந்ததில்லை என போலீசார் உறுதிப்படுத்தியுள்ளனர். எனினும், குழந்தை பிறப்பிற்குப் பிறகு பெண்களுக்கு ஏற்படக்கூடிய ‘மகப்பேற்றுக்கு பிந்தைய மனச்சோர்வு’ அல்லது மனநிலை பாதிப்பு (Postpartum Depression) காரணமாகவே அந்தத் தாய் இத்தகைய விபரீத முடிவை எடுத்திருக்கலாம் என போலீசார் சந்தேகிப்பதோடு, இது குறித்து மேலதிக விசாரணைகளை முன்னெடுத்து வருகின்றனர். இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.