கோயம்புத்தூர் தமிழ்நாடு வேளாண்மைப் பல்கலைக்கழகத்தில் இன்று நடைபெற்ற 1971-76-ஆம் ஆண்டு மாணவர்களின் பொன்விழா சந்திப்பு நிகழ்ச்சியில், நடிகர் ரஜினிகாந்த் காணொலி வாயிலாகக் கலந்துகொண்டு உரையாற்றினார். அப்போது பேசிய அவர், தனது பணிச்சுமை எவ்வளவு அதிகமாக இருந்தாலும், ஆறு மாதத்திற்கு ஒருமுறை தனது நண்பர்களைச் சந்திப்பதை வழக்கமாகக் கொண்டுள்ளதாகத் தெரிவித்தார். நட்பின் முக்கியத்துவத்தை வலியுறுத்திய அவர், பழைய நண்பர்களுடன் செலவிடும் நேரமே தமக்கு மிகுந்த மனநிம்மதியைத் தருவதாகக் குறிப்பிட்டார்.
மேலும் தனது பழைய நினைவுகளைப் பகிர்ந்து கொண்ட ரஜினிகாந்த், தான் பேருந்து நடத்துனராகப் பணியாற்றிய காலத்திலிருந்த நண்பர்களை இன்றும் தொடர்ந்து சந்தித்துப் பேசி வருவதாகக் கூறினார். திரையுலகிற்கு வந்த பிறகு ‘சிவாஜி’ என்ற தனது இயற்பெயரையே தாம் மறந்துவிட்டதாகவும், ஆனால் பழைய நண்பர்கள் இன்றும் தன்னை அதே பெயரிட்டு அழைக்கும்போது மிகுந்த மகிழ்ச்சியாக இருப்பதாகவும் நெகிழ்ச்சியுடன் தெரிவித்தார். ரஜினிகாந்தின் இந்த எதார்த்தமான பேச்சு அங்கு கூடியிருந்த முன்னாள் மாணவர்களிடையே நெகிழ்ச்சியையும் உற்சாகத்தையும் ஏற்படுத்தியது.