திருப்பூர் மாவட்டம் தாராபுரம் அருகே உள்ள குண்டடம் பகுதியில், பொங்கல் பண்டிகை தினத்தன்று இளம்பெண் ஒருவர் அடித்துக் கொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. கொக்கம்பாளையம் கிராமத்தைச் சேர்ந்த பூங்கொடி (26) என்ற பெண், வரபருதுதி காட்டுத்தோட்டம் பகுதியில் தலையில் பலத்த காயங்களுடன் சடலமாக மீட்கப்பட்டார். தனியார் பேருந்து நடத்துனரான இவரது கணவர் அங்கமுத்து, மது அருந்திவிட்டு அடிக்கடி பூங்கொடியுடன் தகராறில் ஈடுபட்டு வந்ததாகக் கூறப்படுகிறது. இந்தச் சூழலில், முக சிதைந்த நிலையில் பூங்கொடியின் உடல் கண்டெடுக்கப்பட்டது அப்பகுதி மக்களிடையே சோகத்தை ஏற்படுத்தியுள்ளது.
சம்பவம் குறித்து தகவல் அறிந்த தாராபுரம் காவல்துறையினர் மற்றும் தடயவியல் நிபுணர்கள் நேரில் சென்று ஆய்வு நடத்தினர். முதற்கட்ட விசாரணையில், இக்கொலை காலை 6 மணி முதல் 7 மணிக்குள் நடந்திருக்கலாம் எனத் தெரியவந்துள்ளது. சந்தேகத்தின் பேரில் பூங்கொடியின் கணவர் அங்கமுத்துவை பிடித்து காவல்துறையினர் தீவிர விசாரணை மேற்கொண்டு வருகின்றனர். காதல் திருமணம் செய்து இரண்டு குழந்தைகளுடன் வாழ்ந்து வந்த நிலையில், குடும்பத் தகராறு காரணமாக இந்தப் படுகொலை நடந்ததா அல்லது வேறு ஏதேனும் பின்னணி உள்ளதா என்பது குறித்து போலீசார் தொடர்ந்து விசாரணை நடத்தி வருகின்றனர்.