2026 தமிழக சட்டமன்றத் தேர்தலுக்கான அரசியல் களம் தற்போதே சூடுபிடிக்கத் தொடங்கியுள்ளது. சமீபத்தில் பாஜக மற்றும் அதிமுக இடையே கூட்டணி உறுதி செய்யப்பட்டு, எடப்பாடி பழனிசாமி அவர்கள் முதலமைச்சர் வேட்பாளராக அறிவிக்கப்பட்ட நிலையில், தற்போது பாஜகவின் ஒரு அதிரடி முடிவு அதிமுக வட்டாரத்தில் பெரும் அதிர்ச்சியை ஏற்படுத்தியுள்ளது. சில முக்கிய தொகுதிகளில் அதிமுகவின் பலத்தை மீறி, பாஜக தன்னிச்சையாக வேட்பாளர்களை அறிவித்துள்ளதாகக் கூறப்படும் தகவல், இரு கட்சிகளுக்கும் இடையே தொகுதிப் பங்கீடு மற்றும் செல்வாக்கு குறித்த மோதலை வெளிச்சம் போட்டுக்காட்டியுள்ளது.
குறிப்பாக, அதிமுகவின் கோட்டை எனக் கருதப்படும் சில தொகுதிகளில் பாஜக தனது வேட்பாளர்களை களமிறக்கத் துடிப்பது, கூட்டணி தர்மத்தை மீறுவதாக அதிமுக நிர்வாகிகள் கருதுகின்றனர். அமித் ஷா அவர்களின் வருகைக்குப் பிறகு கூட்டணியில் உற்சாகம் நிலவிய நிலையில், இந்த வேட்பாளர் அறிவிப்பு விவகாரம் எடப்பாடி பழனிசாமி தரப்பிற்குப் பின்னடைவாகப் பார்க்கப்படுகிறது.
இந்நிலையில் போளூர் தொகுதி பாஜக வேட்பாளர் அறிவிக்கப்பட்ட சம்பவம் அதிமுகவை அதிர்ச்சியில் ஆழ்த்தியுள்ளது. திருவண்ணாமலை, தேவிகாபுரத்தில் நடைபெற்ற பொங்கல் விழாவில் பேசிய பாஜக மாநில துணை தலைவர் டால்பின் ஸ்ரீதரன், இத்தொகுதியில் பாஜகவின் ஏழுமலை போட்டியிடுவார் என அறிவித்தார். இவ்விவகாரம், அங்கு சிட்டிங் MLA-வும், தற்போது சீட்டுக்காகவும் காத்திருக்கும் EX அமைச்சர் SS அக்ரி கிருஷ்ணமூர்த்தியை அதிர்ச்சியில் ஆழ்த்தியுள்ளது.