பாரத ஸ்டேட் வங்கி தனது வாடிக்கையாளர்களுக்கான ஏடிஎம் பரிவர்த்தனை கட்டணங்களை உயர்த்தியுள்ளது, இது பயனர்களிடையே அதிர்ச்சியை ஏற்படுத்தியுள்ளது. கடந்த டிசம்பர் 1, 2025 முதல் நடைமுறைக்கு வந்துள்ள இந்த மாற்றத்தின்படி, நிர்ணயிக்கப்பட்ட இலவச வரம்பைத் தாண்டி பிற வங்கி ஏடிஎம்களில் பணம் எடுக்கும்போது ஒவ்வொரு முறைக்கும் 23 ரூபாய் மற்றும் ஜிஎஸ்டி வசூலிக்கப்படும். அதேபோல், வங்கி இருப்புச் சரிபார்ப்பு மற்றும் மினி ஸ்டேட்மென்ட் போன்ற நிதி சாராத சேவைகளுக்கான கட்டணமும் 11 ரூபாய் மற்றும் ஜிஎஸ்டியாக அதிகரிக்கப்பட்டுள்ளது.
குறிப்பாக, இதுவரை பிற வங்கிகளின் ஏடிஎம்களில் வரம்பற்ற இலவசச் சேவைகளைப் பெற்று வந்த சம்பளக் கணக்கு வைத்திருப்பவர்களுக்கு தற்போது மாதத்திற்கு 10 முறை மட்டுமே இலவச அனுமதி வழங்கப்பட்டுள்ளது. சாதாரண சேமிப்புக் கணக்கு வைத்திருப்பவர்களுக்கு மெட்ரோ மற்றும் கிராமப்புறங்களில் மாதத்திற்கு 5 முறை இலவச பரிவர்த்தனை என்பது தொடர்கிறது. தேவையற்ற கூடுதல் செலவுகளைத் தவிர்க்க, வாடிக்கையாளர்கள் முடிந்தவரை எஸ்பிஐ ஏடிஎம்களையே பயன்படுத்தவும், இருப்பு விவரங்களை அறிய யோனோ செயலி அல்லது இணைய வங்கிச் சேவையை நாடுமாறும் அறிவுறுத்தப்படுகிறார்கள்.