தமிழகத்தில் விரைவில் நடைபெற உள்ள சட்டசபை தேர்தலில், பாஜக மாநில முன்னாள் தலைவர் அண்ணாமலை கோயம்புத்தூர் மாவட்டத்தில் உள்ள ஒரு தொகுதியில் போட்டியிட வாய்ப்புள்ளதாகத் தகவல்கள் வெளியாகியுள்ளன. அதிமுக மற்றும் பாஜக இடையிலான கூட்டணி உறுதி செய்யப்பட்டுள்ள நிலையில், கோவை மாவட்டத்தில் உள்ள 10 தொகுதிகளில் கோவை தெற்கு, கோவை வடக்கு, சிங்காநல்லூர் மற்றும் கிணத்துக்கடவு ஆகிய நான்கு தொகுதிகளில் மூன்றைக் கைப்பற்ற பாஜக திட்டமிட்டுள்ளது. குறிப்பாக, அண்ணாமலைக்கு மக்கள் மத்தியில் இருக்கும் செல்வாக்கைக் கருத்தில்கொண்டு, அவரை சிங்காநல்லூர் அல்லது கோவை வடக்கு ஆகிய தொகுதிகளில் ஒன்றில் களம் இறக்க அக்கட்சியின் மேலிடம் ஆலோசித்து வருவதாகக் கூறப்படுகிறது.
அண்ணாமலைக்குச் சட்டசபைத் தேர்தலில் போட்டியிடத் தனிப்பட்ட முறையில் விருப்பம் இல்லை எனக் கூறப்பட்டாலும், தேர்தல் களத்தில் கட்சியின் வெற்றியை உறுதி செய்ய அவர் போட்டியிட வேண்டும் என மேலிடம் அழுத்தம் கொடுத்து வருகிறது. ஏற்கனவே கடந்த நாடாளுமன்றத் தேர்தலில் கோவையில் போட்டியிட்ட அனுபவம் அவருக்கு இருப்பதால், அங்குள்ள சமூக மற்றும் அரசியல் சூழல் அவருக்குச் சாதகமாக இருக்கும் என நம்பப்படுகிறது. அதே சமயம், அதிமுகவின் கோட்டையாகக் கருதப்படும் கோவை வடக்கு மற்றும் கிணத்துக்கடவு போன்ற தொகுதிகளை பாஜகவிற்காக அதிமுக விட்டுக் கொடுக்குமா என்பது தொகுதிப் பங்கீட்டுப் பேச்சுவார்த்தையின் முடிவிலேயே தெரியவரும்.