தமிழக வெற்றி கழகத்தில் (தவெக) அண்மைக்காலமாக மாற்றுக்கட்சிகளில் இருந்து, குறிப்பாக பாஜக மற்றும் ஆர்எஸ்எஸ் பின்னணி கொண்ட நிர்வாகிகள் அதிகளவில் இணைந்து வருவது அரசியல் விமர்சகர்களிடையே விவாதத்தை ஏற்படுத்தியுள்ளது. இது குறித்து ஊடகவியலாளர் பிஸ்மி தனது ‘வலைப்பேச்சு’ நிகழ்ச்சியில், தவெக கட்சி ‘சங்கிகளின் புகலிடமாக’ மாறி வருகிறதோ என்ற ஐயத்தை எழுப்பியுள்ளார். பாஜக மற்றும் அதிமுகவில் முக்கியப் பொறுப்புகளில் இருந்த சி.டி.ஆர். நிர்மல்குமார் தற்போது தவெகவின் இணைப் பொதுச்செயலாளராக இருப்பது மற்றும் புதுச்சேரி முன்னாள் பாஜக தலைவர் சாமிநாதன், பாஜக முன்னாள் நிர்வாகி ரஞ்சனா போன்றோர் கட்சியில் இணைந்திருப்பதை அவர் சுட்டிக்காட்டியுள்ளார்.
பாஜகவினர் மட்டுமின்றி, திருப்பரங்குன்றம் விவகாரத்தில் அதிருப்தி அடைந்து திமுகவிலிருந்து விலகிய கார்த்திகேயன் போன்ற நிர்வாகிகளும் தவெகவில் இணைந்துள்ளனர். 2026 சட்டமன்றத் தேர்தலை இலக்காகக் கொண்டு விஜய் கட்சியை விரிவுபடுத்தும் வேளையில், வலதுசாரி மற்றும் திராவிடப் பின்னணி கொண்ட நிர்வாகிகள் ஒரே கட்சியில் இணைவது, கட்சியின் கொள்கை நிலைப்பாட்டில் எந்த மாதிரியான தாக்கத்தை ஏற்படுத்தும் என்ற கேள்வி அரசியல் வட்டாரங்களில் எழுந்துள்ளது.