டெல்லியைச் சேர்ந்த 23 வயது இளைஞர் ஒருவர், ரயிலில் குழந்தையுடன் வந்த தம்பதியினருக்குத் தனது இருக்கையை விட்டுக்கொடுக்க மறுத்த சம்பவம் இணையத்தில் விவாதத்தைக் கிளப்பியுள்ளது. ரயில் தாமதமான நிலையில், உடல் மற்றும் மன ரீதியாகச் சோர்வடைந்திருந்த அந்த இளைஞர், தனக்குக் கிடைத்த ‘சைட் லோயர்’ இருக்கையைத் தர முடியாது என்று கறாராகக் கூறிவிட்டார். இதனால் ஆத்திரமடைந்த அந்தத் தம்பதியும் மற்ற பயணிகளும் இளைஞரை ஏளனமாகப் பார்த்ததோடு முணுமுணுக்கத் தொடங்கினர்.
இது குறித்து ரெட்டிட் தளத்தில் அந்த இளைஞர் வருத்தத்துடன் பதிவிட்ட நிலையில், பெரும்பாலான நெட்டிசன்கள் அவருக்கு ஆதரவாகவே கருத்து தெரிவித்துள்ளனர். பணம் கொடுத்து முன்பதிவு செய்த இருக்கையைப் பயணிகளின் சௌகரியத்திற்காக விட்டுத்தர வேண்டிய கட்டாயமில்லை என்றும், ஒருவரின் மறுப்பை ஏற்கும் பக்குவம் மற்றவர்களுக்கு வேண்டும் என்றும் பயனர்கள் பதிவிட்டுள்ளனர். தர்மசங்கடமான சூழலில் மற்றவர்களுக்காகத் தன்னைத் தியாகம் செய்ய வேண்டிய அவசியமில்லை என்ற ரீதியில் இந்தப் பதிவு தற்போது வைரலாகி வருகிறது.