திருவள்ளூர் மாவட்டம் கும்மிடிப்பூண்டி தொகுதிக்குட்பட்ட கவரைப்பேட்டையில், ‘மக்களை காப்போம், தமிழகத்தை மீட்போம்’ என்ற தலைப்பில் அதிமுக பொதுச்செயலாளர் எடப்பாடி பழனிசாமி தேர்தல் பரப்புரை மேற்கொண்டார். அவர் வாகனத்தில் நின்றபடி உரையாற்றிக் கொண்டிருந்தபோது, அருகில் இருந்த திருவள்ளூர் வடக்கு மாவட்ட செயலாளர் சிறுணியம் பலராமன் திடீர் உடல்நலக்குறைவால் மயக்கமடைந்தார்.
மாவட்ட செயலாளர் மயங்கிய நிலையிலும், எடப்பாடி பழனிசாமி அதனைப் பொருட்படுத்தாமல் தொடர்ந்து உரையாற்றிக் கொண்டிருந்தது அங்கிருந்தவர்களிடையே சலசலப்பை ஏற்படுத்தியது. அப்போது, அருகில் இருந்த முன்னாள் அமைச்சர் ரமணா, மயங்கி விழுந்த பலராமனை கைத்தாங்கலாக மீட்டு பேருந்திற்குள் அனுப்பி வைத்தார். சிறிது நேர ஓய்விற்குப் பிறகு உடல்நிலை தேறிய மாவட்ட செயலாளர் பலராமன், எடப்பாடி பழனிசாமி தனது உரையை முடித்துவிட்டுப் புறப்படும்போது அவருக்குச் சால்வை அணிவித்து வீரவாள் பரிசளித்தார்.