தஞ்சாவூர் மாவட்டம் கும்பகோணம் அருகே, துர்க்காதேவி என்ற பெண் தனது கணவர் மாதவனால் கொடூரமாகத் தாக்கப்பட்ட சம்பவம் பெரும் அதிர்ச்சியை ஏற்படுத்தியுள்ளது. 16 ஆண்டுகளுக்கு முன் காதலித்து மணம் புரிந்த இவர்களுக்கு இரண்டு குழந்தைகள் உள்ளனர். ஆனால், துர்க்காதேவிக்கு வேறொருவருடன் தொடர்பு ஏற்பட்டு கள்ளக்காதலாக மாறியது. அவரை கொலை செய்த வழக்கில் மாதவன் சிறை சென்றார்.
அவர் சிறையில் இருந்தபோது, துர்க்காதேவி குழந்தைகளைக் கைவிட்டுவிட்டு மூன்றாவதாக ஒருவருடன் சென்றுவிட்டதாகக் கூறப்படுகிறது. இதனால் ஆத்திரமடைந்த மாதவன், சிறையிலிருந்து வந்தபின் தனது முதல் மனைவியைப் பழிவாங்கத் திட்டமிட்டார்.
குழந்தைகளைப் பார்க்க அழைப்பதாகக் கூறி, துர்க்காதேவியைச் சமாதானம் செய்து தனது இருசக்கர வாகனத்தில் அழைத்துச் சென்றுள்ளார். ஆள் நடமாட்டம் இல்லாத விசலூர் பகுதிக்கு வந்தபோது, தான் மறைத்து வைத்திருந்த உளியால் துர்க்காதேவியின் கழுத்து மற்றும் கைகளில் மாதவன் சரமாரியாகக் குத்தியுள்ளார்.
இரத்தக் காயங்களுடன் துர்க்காதேவி அலறியபடி சாலைக்கு ஓடிவரவே, அங்கிருந்தவர்கள் அவரை மீட்டு மருத்துவமனையில் சேர்த்தனர். இச்சம்பவம் குறித்து வழக்குப் பதிவு செய்த நாச்சியார் கோவில் போலீஸார், தப்பியோடிய மாதவனைக் கைது செய்து அவரிடமிருந்த உளியைப் பறிமுதல் செய்தனர்.