முன்பை விட இன்று மக்கள் தங்கள் உடல் ஆரோக்கியத்தில் அதிக அக்கறை கொள்கிறார்கள். சோசியல் மீடியா வளர்ச்சியின் காரணமாக பலவித இன்ஃபூளுயன்ஸர்களால் பகிரப்படும் டயட் முறைகளை மக்கள் பின்பற்ற தொடங்கியுள்ளார்கள். அதோடு தொழில்நுட்ப வளர்ச்சியால் நாம் சாப்பிடும் உணவு ஆரோக்கியமானதா? அதில் ஏதும் கலப்படம் செய்யப்பட்டுள்ளதா என்பதை எளிதாக கண்டுபிடிக்க முடிகிறது. அதனால் நாம் வாங்கக்கூடிய ஒரு சிறிய பொருளாக இருந்தாலும் அதன் தரத்தை ஆராய்வது அவசியம். இதற்காக அனைத்து பொருட்களிலும் உள்ள பாக்கெட்டுகளில் சில விஷயங்கள் குறிப்பிடப்பட்டிருக்கும். ஆனால் அனைத்து பொருட்களிலும் அனைத்து விஷயங்களையும் எதிர்பார்க்க முடியாது. இது மக்களுக்கு பலவிதமான குழப்பத்தை ஏற்படுத்துகிறது.
இந்நிலையில் சிப்ஸ், முறுக்கு மற்றும் ஊறுகாய் உள்ளிட்ட அனைத்து உணவு பொருட்களின் பாக்கெட்டுகளில் 12 வகையான தகவல்கள் இடம்பெற்றிருக்க வேண்டும் என்று உணவு பாதுகாப்புத்துறை புதிய உத்தரவை பிறப்பித்துள்ளது. அதன்படி தயாரிப்பு தேதி, நிகர எடை, காலாவதி தேதி, ஊட்டச்சத்து, பேட்ச் எண், சைவ மற்றும் அசைவ குறியீடு கட்டாயம் என்றும் குறிப்பிட்டுள்ளது. தகவல்கள் இடம்பெறாவிட்டால் அந்த நிறுவனங்கள் மீது நடவடிக்கை எடுக்கப்படும் என்று உணவு பாதுகாப்புத்துறை எச்சரிக்கை விடுத்துள்ளது