சென்னை, திருவல்லிக்கேணியைச் சேர்ந்த தனியார் நிறுவன ஊழியரான விஜயன் (42), இரண்டு நாட்களுக்கு முன்பு திருத்தணி பேருந்து நிலையம் அருகே உள்ள ஒரு தனியார் தங்கும் விடுதியில் அறை எடுத்துத் தங்கியுள்ளார். இன்று காலை, விஜயன் தங்கியிருந்த அறையிலிருந்து கடும் துர்நாற்றம் வீசியதால், விடுதி ஊழியர்கள் அதிர்ச்சி அடைந்தனர்.
அவர்கள் மாற்றுச் சாவியைப் பயன்படுத்தி அறையைத் திறந்து பார்த்தபோது, விஜயன் படுக்கையில் சுயநினைவின்றி கிடந்தார். தகவலறிந்து வந்த ஆம்புலன்ஸ் ஊழியர்கள் அவரைப் பரிசோதித்து, அவர் ஏற்கனவே உயிரிழந்ததை உறுதி செய்தனர்.
இதையடுத்து அறையில் சோதனை நடத்திய திருத்தணி போலீசார், படுக்கை அருகே அதிக அளவில் மாத்திரைகள் சிதறிக் கிடப்பதைக் கண்டனர். மேலும், விஜயன் எழுதி வைத்திருந்த கடிதம் ஒன்றையும் கைப்பற்றினர். அந்தக் கடிதத்தில், “கடன் தொல்லையால் எனது வாழ்க்கை சீரழிந்து விட்டது.
இதன் காரணமாகவே மாத்திரைகள் சாப்பிட்டு தற்கொலை செய்துகொள்கிறேன். குடும்பத்தினர் தன்னை மன்னித்துவிட வேண்டும்” என்று உருக்கமாகக் குறிப்பிட்டிருந்தார். இந்தக் கடிதத்தின் அடிப்படையில் திருத்தணி போலீசார் வழக்குப்பதிவு செய்து விசாரணை மேற்கொண்டு வருகின்றனர்.