தமிழகத்தில் 2026 சட்டப்பேரவை தேர்தலுக்கு அனைத்து கட்சிகளும் தயாராகி வரும் நிலையில் கூட்டணி மற்றும் சுற்றுப்பயணம் என தற்போது அரசியல் கட்சிகள் முன்னெடுத்து வருகின்றன. இதனிடையே அதிமுக பாஜகவுடன் கூட்டணி அமைத்துள்ளதால் மீண்டும் ஆட்சியை தக்க வைக்க பல வியூகங்களை வகுத்து வருகிறது. அதேசமயம் புதிதாக கட்சியை தொடங்கியுள்ள விஜயை தங்கள் கூட்டணியில் இணைக்கும் முயற்சியிலும் தொடர்ந்து ஈடுபட்டு வருகின்றன. இப்படியான நிலையில் இபிஎஸ் பாஜகவுடன் கூட்டணி வைத்துள்ளதால் நிர்வாகிகள் பலரும் தொடர்ந்து அதிருப்தியை வெளிப்படுத்தி வருகிறார்கள்.
இந்நிலையில் சிங்கம் புலி கூட்டணியாக அதிமுக மற்றும் பாஜக கூட்டணி உள்ளதாக ராஜேந்திர பாலாஜி கூறியுள்ளார். சிங்கமாக இபிஎஸ்ஸும் புலியாக பாஜகவும் உள்ளனர் என்ற அவர், இபிஎஸ் வீட்டை நோக்கி ஜனவரியில் எத்தனை கட்சி தலைவர்கள் வருகிறார்கள் என்பதை பொறுத்திருந்து பாருங்கள் என நம்பிக்கை தெரிவித்துள்ளார். திமுக என்ற கட்சியை சட்டமன்றத்திற்குள் நுழைய வைக்காமல் இருக்க தேவையான தேர்தல் யுக்திகளை இபிஎஸ் மேற்கொண்டு வருவதாகவும் கூறியுள்ளார். இவருடைய இந்த பேச்சு அரசியல் வட்டாரத்தில் பரபரப்பை கிளப்பியுள்ளது.