தமிழக அரசியலில் புதிய கட்சியை தொடங்கி களமிறங்கியுள்ள தமிழக வெற்றி கழகம் தலைவர் விஜய் தன் தேர்தல் பிரச்சாரத்தை கடந்த மாதம் தொடங்கினார். இதனைத் தொடர்ந்து கடந்த மாதம் இறுதியில் கரூரில் நடந்த தேர்தல் பிரச்சார கூட்டத்தில் ஏற்பட்ட நெரிசலில் சிக்கி 41 பேர் பரிதாபமாக உயிரிழந்தனர். இந்த விவகாரம் தமிழக முழுவதும் பெரும் அதிர்வலைகளை ஏற்படுத்திய நிலையில் இது தொடர்பாக வழக்கு தொடரப்பட்டது. சென்னை உயர்நீதிமன்றத்தில் நடந்த வழக்கு விசாரணையில் விஜய் தரப்புக்கு எதிராக நீதிமன்றம் பல கருத்துக்களை பதிவு செய்திருந்த நிலையில் கட்சி நிர்வாகிகள் மீதும் வழக்குப்பதிவு செய்யப்பட்டது.
இப்படியான நிலையில் உச்ச நீதிமன்றத்தில் மனுதாக்கல் செய்யப்பட்டிருந்த நிலையில் கரூர் விவகாரத்தை சிபிஐ விசாரணைக்கு மாற்றி நீதிமன்றம் உத்தரவிட்டது. இந்நிலையில் கரூர் துயரில் உயிரிழந்த 41 பேரின் குடும்பங்களுக்கு விஜய் தரப்பில் தலா 20 லட்சம் வழங்கப்பட்டுள்ளதாக அறிவிப்பு வெளியாகி உள்ளது. 41 பேரின் குடும்பங்களை விஜய் நேரில் சந்தித்து நிதியுதவி வழங்குவார் என கூறப்பட்ட நிலையில், அவர்களுடைய வங்கி கணக்கில் பணம் செலுத்தப்பட்டுள்ளது. முன்னதாக உயிரிழந்தவர்களின் குடும்பத்தினரிடம் விஜய் வீடியோ காலில் பேசி ஆறுதல் கூறியிருந்தது குறிப்பிடத்தக்கது