சேலம் மாவட்டம் கிச்சிப்பாளையத்தை சேர்ந்தவர் ஆறுமுகம். இவரது மகள் கோரிமேடு பகுதியில் உள்ள செவிலியர் கல்லூரியில் படித்து வருகிறார். நேற்று முன்தினம் இரவு 7 மணிக்கு மாணவி அரசு நகர பேருந்தில் ஏறி பழைய பேருந்து நிலையத்திற்கு வந்து கொண்டிருந்தார். அப்போது ஒரு வாலிபர் மாணவியை கிண்டல் செய்து பாலியல் ரீதியாக தொந்தரவு அளித்ததாக தெரிகிறது. இதுகுறித்து மாணவி நடத்துனர் திருமுருகனிடம் கூறியும் அவர் வாலிபரை கண்டிக்கவில்லை.
இதனால் கோபமடைந்த மாணவி செல்போன் மூலம் பெற்றோருக்கு தகவல் தெரிவித்துள்ளார். உடனே மாணவியின் பெற்றோர், உறவினர்கள் பழைய பேருந்து நிலையத்தில் திரண்டனர். பேருந்து வந்தவுடன் அவர்கள் அந்த வாலிபரை தேடி உள்ளனர். ஆனால் அவர் முன்னதாகவே இறங்கி சென்றார்.
இதனால் மாணவியின் பெற்றோரும், உறவினர்களும் தகராறு செய்து நடத்துனர் திருமுருகன், ஓட்டுனர் தனபால் ஆகியோரை தாக்கியுள்ளனர். இதனால் காயமடைந்த இருவரும் மருத்துவமனையில் தற்போது சிகிச்சை பெற்று வருகின்றனர். இதுகுறித்து புகாரின் பேரில் வழக்குபதிவு செய்த போலீசார் ஆறுமுகம், பாலமுருகன் ஆகிய இரண்டு பேரையும் கைது செய்தனர். இந்த வழக்கில் தொடர்புடைய மற்ற நபர்களை போலீசார் தேடி வருகின்றனர்.