தமிழகத்தில் 2026 ஆம் ஆண்டு சட்டமன்ற தேர்தல் நடைபெற உள்ள நிலையில் அனைத்து கட்சிகளும் தீவிரமாக தேர்தல் பணியில் ஈடுபட்டு வருகின்றன. தமிழகத்தில் மீண்டும் எப்படியாவது ஆட்சியைப் பிடித்து விட வேண்டும் என்று திமுக தலைமை ஒரு பக்கம் சிந்தித்து கொண்டு இருக்க மறுப்பக்கம் எடப்பாடி பழனிச்சாமி அதிமுக ஆட்சியை மீண்டும் கொண்டு வருவதற்கான வேலைகளை செய்து வருகின்றார். இவர்களுக்கு இடையே தமிழக வெற்றி கழகம் தலைவர் விஜய் புதிய ஆட்சியை மக்களுக்கு கொடுக்க வேண்டும் என்பதில் உறுதியாக உள்ளார். என்னதான் மற்ற கட்சிகள் போட்டி போட்டுக் கொண்டிருந்தாலும் திமுகவின் கூட்டணி என்பது பலமாக உள்ளது. அதனால் மீண்டும் திமுக ஆட்சி தான் அமையும் என்ற நம்பிக்கையில் முதல்வர் ஸ்டாலின் உள்ளார்.
இப்படியான நிலையில் திமுக அணிகளில் புதிய பொறுப்பாளர்கள் நியமிக்கப்பட்டுள்ளனர். அதன்படி திமுக சிறுபான்மையினர் நல உரிமை பிரிவு துணைச் செயலாளர்களாக ராபர்ட், ராஜேஷ் ஜெயின், பொன் சீலன் ஆகியோர் நியமிக்கப்பட்டுள்ளனர். நெசவாளி அணி துணைச் செயலாளராக சரவணன், மருத்துவ அணி இணைச் செயலாளராக அண்ணாமலை, காஞ்சி வடக்கு அமைப்புசாரா ஓட்டுனர் அணி தலைவராக ஏஎன் லட்சுமிபதியும் நியமிக்கப்பட்டுள்ளனர். நேற்று தஞ்சை வடக்கு மாவட்ட செயலாளர் பதவியில் இருந்து கல்யாணசுந்தரம் நீக்கப்பட்டது குறிப்பிடத்தக்கது.