முந்தைய காலத்தில், திருமணங்கள், மணமகள் வீடுகளிலோ அல்லது அருகில் உள்ள கோவில்களிலோ மிக எளிமையாக நடந்தன. இப்போது, திருமணம் என்பது வசதி படைத்தவர்களின் ஆடம்பர திருவிழாவாக மாறிவிட்டது. கேட்டரிங், ஆர்க்கெஸ்ட்ரா, டெக்கரேஷன், மேக்கப் செக்ஷன் என பலவிதமான ஆடம்பர விஷயங்கள் இதில் கொண்டுவரப்பட்டு விட்டன. இப்போது வெல்கம் கேர்ள்ஸ் என்ற புதிய கலாசாரம் தமிழ்நாட்டு திருமணங்களில் அதிகரித்து வருகிறது. அதாவது திருமண மண்டபங்களில் நுழையும் வாயலில் ரிஷப்சனிஸ்ட் பகுதியில்நின்று வரவேற்கும் பெண்கள்தான் வெல்கம் கேர்ள் என அழைக்கப்படுகின்றனர்.
இதுகுறித்து வெல்கம் கேர்ள் ஈவன்ட் ஆர்கனைசர், நடிகை மதுப்பிரியா நேர்காணல் ஒன்றில் கூறியதாவது, இதை பார்ட் டைம் ஆக கல்லூரி மாணவியர், குடும்ப பெண்கள் ஆர்வமாக வருகின்றனர். இதில் குறிப்பிட்ட சில மணி நேரங்களில் நல்ல வருமானம் கிடைக்கிறது. இதில் நல்ல நிறமாக இருக்கும் பெண்களுக்கு ரூ. 700 முதல், ரூ. 1500 முதல் சம்பளமாக கிடைக்கும். அவர்களுக்கேற்ப நல்ல உயர்தர ஆடைகளும், நிகழ்ச்சியின் போது உடுத்திக்கொள்ள தரப்படும். அதே போல் நிறம் குறைந்த, கருப்பான பெண்களுக்கு ரூ. 500 முதல் 600, ரூ. 700 வரை சம்பளம், அவர்களுக்கு ஏற்ப உடைகள் தரப்படும்.
இதில் மிக அழகான பெண்கள் மட்டுமே, ரிஷப்சன் பகுதியில் நிற்க அனுமதிக்கப்படுவர். சுமாராக உள்ள பெண்களை, மண்டபத்தில் டைனிங் ஹாலில் சூப்பர்வைசராக நிறுத்தி விடுவர். சிலரை ஜூஸ் போன்றவற்றை தருமாறும் கூறுவர். திருமணத்துக்கு வரும் சிலர், இந்த பெண்களிடம் தவறாக நடந்து கொள்வதும் உண்டு. சில பெண்களை ஏமாற்றி, இதுபோன்ற நிகழ்ச்சிகளுக்கு உன்னை வெல்கம் கேர்ள் வேலைக்கு அழைக்கிறேன் என்று கூறி பெண்களை ஏமாற்றுபவர்களும் உண்டு. ஒரே இடத்தில் பெண்களுக்கு இடையே கருப்பு, சிவப்பு என்ற பாகுபாடு காட்டுவது மிகவும் அபத்தமான, ஏற்றுக்கொள்ள முடியாத விஷயமாக தான் இருக்கிறது. ஆனால் வருமானம் முக்கியம் என்பதால் அதையும் பெண்கள் சகித்துக்கொள்வதை தவிர வேறு வழியின்றி வருகின்றனர் என்கிறார் மதுப்பிரியா.