கமர்ஷியல் படங்களை எடுப்பதில் புகழ்பெற்ற இயக்குனர் ஹரி. இவர் இயக்கும் படங்கள் மிகவும் தரமானதாக இருக்கும் என்பது நம் அனைவருக்கும் தெரிந்த ஒன்றே. இவர் முதலில் 2002ஆம் ஆண்டில் ‘தமிழ்’ என்ற தமிழ் திரைப்படத்தின் மூலம் திரையுலகிற்கு இயக்குனராக அறிமுகமானார். இதனை தொடர்ந்து சாமி, கோவில், பூஜை, சிங்கம்-3, சாமி 2 போன்ற முன்னணி நடிகர்களை வைத்து படங்களை இயக்கி மாபெரும் வெற்றியைக் கண்டார்.
இவர் கடந்த வருடம் நடிகர் அருண் விஜய்யை வைத்து இவர் இயக்கிய ‘யானை’ திரைப்படம் ஓரளவு மக்கள் மத்தியில் நல்ல வரவேற்பை பெற்றது. இயக்குனர் ஹரி பிரபல தமிழ் நடிகர் விஜயகுமாரின் மகளான நடிகை பிரீத்தா விஜயகுமாரை திருமணம் செய்து கொண்டார். இவர்களுக்கு மூன்று மகன்கள் உள்ளனர்.
இந்நிலையில், ஹரியின் தந்தை வி.ஆ.கோபாலகிருஷ்ணன் சென்னையில் இன்று காலமானார். அவருக்கு வயது 88. கடந்த சில ஆண்டுகளாக உடல்நலம் பாதிக்கப்பட்டிருந்த அவர் தனியார் மருத்துவமனையில் அனுமதிக்கப்பட்டு, சிகிச்சை பெற்று வந்தார். இந்த சூழலில் சிகிச்சை பலனின்றி இன்று காலை கோபாலகிருஷ்ணனின் உயிர் பிரிந்தது.
அவருக்கு ஐந்து மகன்கள் மற்றும் இரண்டு மகள்கள் உள்ளனர். சென்னையில் வைக்கப்பட்டுள்ள அவரது உடலுக்கு திரைபிரபலங்கள் அஞ்சலி செலுத்தி வருகின்றனர். இதன்பின் தூத்துக்குடி மாவட்டத்தில் உள்ள அவரது சொந்த ஊருக்கு உடல் கொண்டு செல்லப்பட்டு நாளை இறுதி சடங்குகள் நடைபெறுகிறது.