“அந்த ஒரு ஃபோன் கால்”…. நள்ளிரவில் பெற்றோருக்கு அதிர்ச்சி கொடுத்த மகன்…. பழிவாங்க துடித்த சைக்கோ…. ஒரே இரவில் 6 உயிர்கள் பறிபோன கொடூரம்….!

தெலங்கானா மாநிலம் ரங்கா ரெட்டி மாவட்டத்தில் ஒட்டுமொத்த தேசத்தையும் உலுக்கும் வகையிலான மிகக் கொடூரமான குற்றச் சம்பவம் ஒன்று அரங்கேறியுள்ளது. பாலியல் வன்கொடுமை வழக்கில் (போக்சோ) கைது செய்யப்பட்டு, சமீபத்தில் ஜாமினில் வெளியே வந்த ராஜ்குமார் (35) என்ற நபர், பழிவாங்கும் நோக்கில் ஒரே இரவில் அடுத்தடுத்து 6 பேரை அடித்துக் கொலை செய்துள்ளார். இந்த கோர சம்பவத்தில் அவரது சொந்த குடும்பத்தினரும், அவர் மீது புகாரளித்த சிறுமியின் குடும்பத்தினரும் பலியாகியுள்ளனர்.

முதலில் ஷாபத் பகுதியில் உள்ள தனது வீட்டில் மனைவியுடன் தகராறில் ஈடுபட்ட ராஜ்குமார், ஆத்திரத்தில் மனைவி பார்வதி சரிதாவை மிகக் கொடூரமாகத் தாக்கியுள்ளார். அத்தோடு நில்லாமல், தங்களின் 4 வயது மற்றும் 18 மாதங்களே ஆன இரண்டு பிஞ்சு ஆண் குழந்தைகளையும் அடித்து அநியாயமாகக் கொலை செய்துள்ளார். சொந்தக் குடும்பத்தையே அழித்த அந்த நபர், அங்கிருந்து சற்றும் இரக்கமின்றி அடுத்த இலக்கை நோக்கி நகர்ந்துள்ளார்.

தன் சொந்த வீட்டின் கொலை வெறியாட்டத்தை முடித்த கையோடு, அங்கிருந்து சுமார் 6 கிலோமீட்டர் தொலைவில் உள்ள ஒரு கிராமத்திற்கு ராஜ்குமார் சென்றுள்ளார். அங்கு கடந்த மே மாதம் தன் மீது போக்சோ சட்டத்தின் கீழ் பாலியல் புகார் அளித்த 17 வயது சிறுமியின் வீட்டிற்குள் புகுந்து, அச்சிறுமியை அடித்துக் கொலை செய்துள்ளார். அதனைத் தடுக்க முயன்ற சிறுமியின் தாய் மற்றும் பாட்டியையும் அவர் விட்டுவைக்கவில்லை. அவர்களையும் கொடூரமாகத் தாக்கி உயிரைப் பறித்துள்ளார்.

இரண்டு வெவ்வேறு இடங்களில் இந்த 6 கொலைகளையும் அரங்கேற்றிய பின்னர், ராஜ்குமார் தனது பெற்றோருக்கு தொலைபேசி மூலம் தகவல் தெரிவித்துவிட்டு தலைமறைவாகியுள்ளார். இச்சம்பவம் குறித்து வழக்குப் பதிவு செய்துள்ள காவல்துறையினர், தப்பியோடிய குற்றவாளியைப் பிடிக்கத் தனிப்படைகள் அமைத்து தீவிரமாகத் தேடி வருகின்றனர். போக்சோ வழக்கில் ஜாமினில் வெளிவந்த ஒரு நபர், பாதுகாப்பு இல்லாத சூழலில் இந்த அளவுக்குக் கொடூரமான பழிவாங்கல் கொலைகளைச் செய்திருப்பது அப்பகுதியில் பெரும் அதிர்ச்சியையும் அச்சத்தையும் ஏற்படுத்தியுள்ளது.