பெண்களே உஷார்!… ஜூஸில் மயக்க மருந்து… தனிமையில் இருந்த பெண்ணுக்கு நேர்ந்த கொடூரம்… கோவையை உலுக்கிய கூட்டு பாலியல் பலாத்காரம்…!

கோவை மாவட்டம் சூலூர் தென்றல் நகர் பகுதியைச் சேர்ந்த 33 வயதுடைய வீடியோ எடிட்டிங் பெண் தொழிலதிபர் ஒருவருக்கு, கடந்த 2019-ஆம் ஆண்டு திருமணமாகி, கருத்து வேறுபாடு காரணமாக 2023 முதல் கணவரை பிரிந்து தனது 4 வயது மகனுடன் தனியாக வசித்து வருகிறார். சூலூர் கலையரங்கம் பின்புறம் உள்ள கட்டிடத்தில் அறை எடுத்து வீடியோ எடிட்டிங் தொழில் செய்து வந்தபோது, அதே கட்டிடத்தின் பக்கத்து அறையில் தங்கியிருந்த திண்டுக்கல் மாவட்டத்தைச் சேர்ந்த அந்தோணி மரிய ராபின் (28) என்பவருடன் பழக்கம் ஏற்பட்டுள்ளது. பெண்ணின் குடும்ப சூழ்நிலையை சாதகமாக்கிக் கொண்ட மரிய ராபின், அவரை திருமணம் செய்து கொள்வதாக ஆசை வார்த்தைகள் கூறி கடந்த ஒரு ஆண்டாக நெருக்கமாக பழகி வந்துள்ளார். இந்நிலையில், மரிய ராபினுக்கு வேறொரு பெண்ணுடன் திருமண ஏற்பாடுகள் நடப்பதை அறிந்து அந்த இளம்பெண் அவரிடம் வாக்குவாதத்தில் ஈடுபட்டு, கடந்த சில நாட்களாக இருவரும் பேசாமல் இருந்து வந்துள்ளனர்.

சம்பவத்தன்று மதியம், சமாதானம் பேசுவதாகக் கூறி அந்தோணி மரிய ராபின் தனது நண்பரான திருச்சியைச் சேர்ந்த கிரிஷ் சாமுவேல் குமார் (30) என்பவருடன் பெண்ணின் அலுவலகத்திற்கு வந்துள்ளார். அங்கு இளம்பெண்ணுக்கு மயக்க மருந்து கலந்த ஜூஸ் கொடுத்து, அவர் மயக்கமடைந்த நிலையைப் பயன்படுத்தி இருவரும் சேர்ந்து அவரை கூட்டு பாலியல் பலாத்காரம் செய்துள்ளனர். பின்னர் மயக்கம் தெளிந்து பெண் கேள்வி எழுப்பியபோது, தாங்கள் பாலியல் உறவு கொண்ட காட்சிகளை செல்போனில் வீடியோ எடுத்துள்ளதாகக் கூறி அதிர்ச்சி அளித்துள்ளனர். மேலும், “என்னை திருமணம் செய்ய வற்புறுத்தினாலோ அல்லது போலீசில் புகார் அளித்தாலோ, இந்த வீடியோவை சமூக வலைத்தளங்களில் வெளியிட்டு உன்னையும், உன் மகனையும் கொலை செய்து விடுவோம்” என அந்த கும்பல் கொலை மிரட்டலும் விடுத்துள்ளது.

இதனால் பெரும் அதிர்ச்சி அடைந்த இளம்பெண், தைரியமாக கருமத்தம்பட்டி அனைத்து மகளிர் காவல் நிலையத்தில் புகார் அளித்தார். புகாரின் பேரில், கூட்டு பாலியல் பலாத்காரம் மற்றும் கொலை மிரட்டல் உள்ளிட்ட பல்வேறு பிரிவுகளின் கீழ் வழக்குப்பதிவு செய்த போலீசார் தீவிர விசாரணையில் இறங்கினர். இதனைத் தொடர்ந்து, சூலூர் புதிய பேருந்து நிலையம் அருகே பதுங்கியிருந்த கிரிஷ் சாமுவேல் குமாரை தனிப்படை போலீசார் அதிரடியாகக் கைது செய்து, நீதிமன்றத்தில் ஆஜர்படுத்தி சிறையில் அடைத்தனர். மேலும், இந்த கொடூர சம்பவத்தில் ஈடுபட்டு தற்போது தலைமறைவாக உள்ள முக்கிய குற்றவாளியான அந்தோணி மரிய ராபினை கைது செய்ய தனிப்படை அமைத்து தீவிரமாக தேடி வருகின்றனர். கோவையில் அரங்கேறிய இந்த அதிர்ச்சி சம்பவம் அப்பகுதியில் பெரும் பரபரப்பை ஏற்படுத்தியுள்ளது.