“2028-ல் காத்துக் கொண்டிருக்கும் 3 சீட்டுகள்..! காங்கிரஸுக்கு சீட் கொடுத்த விஜய்யின் தீர்க்கமான அரசியல் ஸ்கெட்ச்..!!

தமிழகத்தில் கட்சித் தொடங்கி இரண்டரை ஆண்டுகளிலேயே ஆட்சியைப் பிடித்த தமிழக வெற்றிக் கழகம் (தவெக), தங்களுக்குக் கிடைக்க வேண்டிய ஒரு ராஜ்யசபா இடத்தை கூட்டணிக் கட்சியான காங்கிரஸுக்கு விட்டுக்கொடுத்துள்ளது. தமிழகத்தில் மொத்தம் 18 ராஜ்யசபா இடங்கள் உள்ள நிலையில், ஒவ்வொரு 2 ஆண்டுகளுக்கும் ஒருமுறை 6 இடங்களுக்கான தேர்தல் நடைபெறும். ஒரு ராஜ்யசபா உறுப்பினரைத் தேர்ந்தெடுக்க 34 முதல் 35 எம்.எல்.ஏ-க்களின் ஆதரவு தேவை என்ற நிலையில், தற்போதைய தனிநபர் இடைத்தேர்தல் வாய்ப்பை தவெக கூட்டணிக்காக விட்டுக் கொடுத்துள்ளதால், தங்களின் சொந்தக் குரலை டெல்லியில் ஒலிக்கச் செய்ய தவெக தொண்டர்கள் இன்னும் எத்தனை ஆண்டுகள் காத்திருக்க வேண்டும் என்ற கேள்வி எழுந்துள்ளது.

அரசியல் கணக்கீடுகளின்படி, தவெக தனது சொந்த பலத்திலோ அல்லது கூட்டணிக் கட்சிகளின் ஆதரவோடோ நாடாளுமன்ற உறுப்பினரை டெல்லிக்கு அனுப்ப இன்னும் குறைந்தது 2 ஆண்டுகள் (2028 வரை) காத்திருக்க வேண்டும். வரும் 2028-ல் தமிழகத்தில் மீண்டும் 6 ராஜ்யசபா இடங்கள் காலியாகும்போது, தவெகவுக்கு 3 எம்.பி-க்களைத் தேர்ந்தெடுக்கும் வாய்ப்பு கிடைக்கும். அதன்பின்னர், அடுத்தடுத்த சுற்றுகளாக ஜூலை 2031 மற்றும் ஏப்ரல் 2032 ஆகிய ஆண்டுகளில் தலா 6 இடங்களுக்கான ராஜ்யசபா தேர்தல்கள் வரவுள்ளன.

விஜய்யின் இந்த வியூகத்திற்குப் பின்னால் ஒரு தீர்க்கமான அரசியல் கணக்கு இருப்பதாக விமர்சகர்கள் கருதுகின்றனர். மத்தியில் பாஜகவை எதிர்க்கும் தேசியக் கூட்டணியை வலுப்படுத்தவும், தமிழகத்தில் காங்கிரஸ் உடனான இணக்கமான உறவைத் தக்கவைக்கவும் இந்த முடிவு எடுக்கப்பட்டுள்ளது. அவசரப்பட்டு ஒரு இடத்தைப் பெறுவதை விட, கூட்டணி தர்மத்தை மதிப்பதன் மூலம் வரும் நாடாளுமன்ற மற்றும் உள்ளாட்சித் தேர்தல்களில் பெரிய பலனைப் பெறலாம் என்ற தவெகவின் இந்த தாராள மனப்பான்மை, எதிர்காலத்தில் அதன் அரசியல் செல்வாக்கை உயர்த்த உதவும் என நம்பப்படுகிறது.