காவல்துறையில் 2,545 புதிய பணியிடங்கள்..! 354 கோடி நிதி ஒதுக்கீடு.. களமிறங்கும் சிங்கப்பெண் படை.. அரசாணை வெளியிட்ட தமிழக அரசு…!!

தமிழகத்தில் பெண்கள் மற்றும் குழந்தைகளின் பாதுகாப்பை உறுதி செய்யும் வகையில், முதலமைச்சர் விஜய் தலைமையிலான அரசு ‘சிங்கப்பெண் சிறப்பு அதிரடிப்படை’ உருவாக்கத்திற்கான அரசாணையை வெளியிட்டுள்ளது. மாநிலம் முழுவதும் இத்திட்டத்தை செயல்படுத்த ₹354 கோடி நிதி ஒதுக்கீடு செய்யப்பட்டுள்ளதுடன், இதற்காக 2,545 புதிய பணியிடங்கள் உருவாக்கப்பட்டுள்ளன. இதில் 49 காவல் ஆய்வாளர்கள், 641 உதவி ஆய்வாளர்கள் மற்றும் 1,843 காவலர்கள் எனப் பல்வேறு நிலைகளில் பணியாளர்கள் நியமிக்கப்பட்டு, அவர்களுக்குச் சிறப்புப் பயிற்சிகள் வழங்கப்படும். இந்தப் படை முதலமைச்சரின் நேரடிக் கண்காணிப்பில் இயங்கும் என்பது குறிப்பிடத்தக்கது.

இந்த அதிரடிப்படையானது பேருந்து நிறுத்தங்கள், ரயில் நிலையங்கள், கல்வி நிறுவனங்கள் மற்றும் தகவல் தொழில்நுட்ப பூங்காக்கள் போன்ற பொதுமக்கள் அதிகம் கூடும் இடங்களில் தீவிர ரோந்துப் பணிகளை மேற்கொள்ளும். குறிப்பாக, குற்றங்கள் நடக்க வாய்ப்புள்ள பகுதிகளைக் கண்டறிந்து கண்காணிப்பை மேம்படுத்துவதும், காவல்துறையின் இருப்பை அதிகப்படுத்தி சட்டவிரோத செயல்களைத் தடுப்பதும் இதன் முக்கிய நோக்கமாகும். நவீன தொழில்நுட்ப வசதிகளுடன் செயல்படவுள்ள இந்தப் படைக்கு 319 நான்கு சக்கர வாகனங்களும், 101 இருசக்கர வாகனங்களும் வழங்கப்பட உள்ளன.

பாதுகாப்புப் பணிகளை அடுத்தகட்டத்திற்கு கொண்டு செல்லும் வகையில், ஆளில்லா வான்வழி வாகனங்கள் மூலம் கண்காணிப்பு மற்றும் ரோந்துப் பணிகள் மேற்கொள்ளப்படும். மேலும், காவலர்கள் அணியும் உடைகளில் நிகழ்நேரக் காணொளி ஒளிபரப்புத் திறன் கொண்ட கேமராக்கள் பொருத்தப்பட்டு, கள நிலவரங்கள் உடனுக்குடன் கண்காணிக்கப்படும். ஒரு காவல்துறை தலைவரின் கீழ் இயங்கும் இந்த அமைப்பில், தலைமையகக் கண்காணிப்பிற்காகத் தனியே அதிகாரிகள் குழு நியமிக்கப்பட்டுள்ளது. இதன் மூலம் மாநிலம் முழுவதும் உள்ள 270 கள அலகுகள் ஒருங்கிணைக்கப்பட்டு பெண்களுக்கான பாதுகாப்பான சூழல் உறுதி செய்யப்படும்.